咱猶是囡仔的時陣，啥物攏「慢」，慢慢仔爬，慢慢仔行，慢慢仔講話，慢慢仔食飯，嘛慢慢仔學寫字，這是考驗大人耐性的時陣，囡仔可能物件行到佗位落到佗位，愛予大人來收拾；囡仔可能寫字無夠大人要求的程度，大人提著鉛筆擦佇邊仔等。囡仔一日一日大漢，總算會使家己作主，總算會使家己掠進度，總算會使家己負責的時陣，大人才開始沓沓仔放手。
厝裡的序大人一日一日老，開始耳空聽袂清楚、目睭看袂清楚，開始倒轉去親像囡仔的動作，這嘛是考驗咱耐性的時陣，愛陪序大人沓沓仔講話，沓沓仔食物件，沓沓仔起來、沓沓仔倒落眠床，沓沓仔食藥、換藥，所有的動作毋但愛慢嘛愛足細膩，袂使緊，序大人的話愈講愈少，會使食的物件嘛愈來愈少，這時陣，咱咧看伊，伊會笑笑，序大人咧講咱聽有猶是聽無的代誌，咱愛有反應，按呢就有夠矣，其他的，就莫閣勉強伊！莫一直考序大人：「我是誰？」
慢，是一門學問，佇人的一生中煞有足重要的位置，咱愛好好仔去學習！