金門的鄉里串按呢講：「下市，罾；洪門港，燒酒矸；水頭，鱟；金門城，肉豆；許坑，歹奧；山仔兜，狗；……。」
細漢的時陣，第一擺聽著我徛的山仔兜是狗的時，規人攏戇去，想無通有遐爾濟閣■的閩南大厝，宗親感情嘛足予人感動，山仔兜乜代予人佮「狗」聯想做一下？
我走去問阮阿爸：「山仔兜乜代是『狗』？咱敢親像『狗』彼種精牲？干焦對主人死忠，賰的攏無，閣較講嘛袂通啊！」
阿爸文文仔笑，挲挲我的頭講：「戇囡仔，『狗』敢無好？狗較贏貓，貓干焦會掠鳥鼠家己食，猶閣會曉乜仔奶？」
我連想嘛無就應講：「會偷食，毋管啥物物件，橫直會食的，若無收好勢，攏會予伊偷食去。」
我紲落講：「親像昨昏頓，阿姐袂記咧收食賰的魚，本正欲今仔日下晝閣食，無想著予伊偷食去，害我下晝食泔糜煞無物配，足討人厭的貓。」
阿爸■■頭：「著啊！你攏知影貓的歹處，貓四界偷食，毋才看著人，若親像做賊相仝，就想欲走。狗呢？你講看覓。」
「狗啊！半暝會鬥看門，予賊毋敢來咱第偷提物件，日時閣會佮我■■。」
「講來狗誠實比貓較好，毋過我猶是想毋通山仔兜乜代是狗？」
阿爸欶一喙薰，歇喘一口氣，紲落去煞恬恬無講話。
「阿爸！敢講連你猶袂知？」我一下著急，若親像雞公披搏跳。
「彼講起來話就長，愛對三、四十年前講起。」
「你講！你講！我恬恬仔聽。」我夯一塊椅頭仔佇阿爸面頭前坐落下。
「三、四十年前，山仔兜是一足有錢的鄉里，鄉里內誠濟人去南洋趁錢，趁著錢就寄倒來厝飼某囝、有孝序大，閣有賰錢通起大厝，親像薛永南兄弟洋樓，大社彼間洋樓，猶閣有幾若間的三落大厝，逐間攏嘛起甲誠■閣氣派，對外口看就知影徛彼間的人足有錢。」
「山仔兜除了有■閣氣派的大厝，嘛出誠濟做官的人，親像『將軍第』是清朝總兵薛師儀徛的厝；『大夫第』是六品官徛的厝。毋才有一句話講：『有水頭厝，無山仔兜富』，山仔兜人攏是好額人啊！」
「山仔兜人遮爾■，乜代猶予人叫做狗？」我是痚呴袂忍得嗽，又閣開喙問。
阿爸刁工問：「你共想看覓，有錢閣有勢的人，上驚是啥物？」
「這用鼻仔想嘛知，驚錢無去，抑是官無去。」我親像包公斷案，規面的自信。
阿爸紲落講：「著啊！驚錢予人偷提，驚無官通做。」
「彼陣警察誠少，根本無法度管你遐爾濟，百姓若欲守家伙攏嘛愛靠家己。」
「靠家己？哪有可能？咱猶無法度佮賊仔拚命。會做賊的人攏嘛足大膽的，袂輸土匪相仝。」
「無警察通保護，咱亦無膽佮賊仔拚命，這聲害矣！欲怎仔樣才好？」我對椅頭徛起來，戇戇踅。
阿爸看矣，對我搖搖頭，笑咍咍。我予阿爸笑甲規面紅絳絳。
「講規哺久，你遮戇查某囝猶閣想無？」
我頭敧一爿，想啊想，頭殼雄雄開竅，親像對暗房行出來，看著面頭前的日頭光。
「我知啦！飼狗顧門！」
坐佇交椅的阿爸這馬對著我■■頭閣翹起大頭拇。
「因為驚賊來偷，所以山仔兜家家戶戶攏飼狗，毋才會有『山仔兜，狗』這句話。」