塗豆收成的前後，時間拄空縫，相招三四個囡仔，行到埔頂雜錯地，這所在落雨否著水，除了石頭卵、沙母粒、包萵、埔倫、蜈蚣草仔、矮的相思樹，久年佇遐，賰欸！攏是無發草的空竭地。
　　鳥仔天頂佇咧叫！孽譎囡仔，舉頭對伊唸：「鵏丟仔哂哂哂！生囝無塊憩，佇迄草埔下，予彼死囡仔踏一下！」若唸若行。即時紲落，看東看西，是靜棲棲，草仔揙閣揣，見塗面有姷閣清氣的孔，揣著啦！有的提燒酒矸，有的捾歹茶鈷，往水堀、墓堀、電線溝等等的所在，揣著水舀屹才來灌孔，水滇矣滿出來，靜靜跔咧等，即久看無動靜，換揣別一跡；拄著運氣好，蟋蟀注著水，即時擋袂牢，探頭趖踹，細隻是母的，放落據伊去，大隻是公的，立捷就掠屹，心情誠是暢忽忽！安爾生，一孔紲一孔。若是陷落成大孔喙，水灌落是作白工，彼孔一定無蟋蟀！因量伊有周至的習慣。
　　埔頂踅迵迵，行去赤仔埔，彼勢番薯園，是第二選擇。掀藤隨股去，股頂股邊看著孔，踅水全然無彩工，因端是沙質，灌水霎仔時，水就全消失，即款情形欲怎樣？利用長草枝，逗逗伸入去，內身撓加拄。有時兒，看著蟋蟀頭動鬚，草尖挓伊的尾溜，趁到孔口即跳踹，承紲掠入銅筐內。彼方法，著知勢面加耐性，一點仔都袂阿差。各人數隻掠到第飼，囡仔歡喜作齊參詳，三不五時作藝量，開講飼蟋蟀的經驗。
下昏時八九點，囡仔攑電火出門，踏入別人第的深井內，「一略對狀」觀看石枋頂，罐仔型三不等，蟋蟀成孤隻，徛佇罐仔內，內底鋪塗沙，近兩公分深，塗仁供伊食。有的塗仁拄入沙塗，會生出青仔欉，日勢有影下通行，曝袂著日，「囡仔就是囡仔」，家己作家己對。加崁鐵蓋，釘有十外孔通透空氣，半暝接露水。「特！特！特！」相賽叫，展屹雙翅，後骹弓懸懸，出勢比氣力。順續相招明日下晡，來去宮口頭前「見輸贏」。
　　時到大細漢，攏總圍偎來，等看咬蟋蟀！石勘拄砛石的所在，「自由之火」的火煨仔殼，將兩三個捒拄邊，空對空相接，加量空位作出入，到這個下落，來拚！來拚！先攢三兩條長頭毛，掣矣查某嬰哀哀叫！大人興相教：拈長頭毛拗成一個箍，套入蟋蟀頷頸，空中踅十外環，安爾生叫作「吊煌」，練矣伊就會起狂；另外步數，手盤拗屈相換接，予伊進出軁無停，洶洶換勢手敲手，顧伊空中拋輪斗，連鞭準準來接身，號作「溜蟋蟀」，練矣予伊直頭爭。有人技術差，學矣成大人，亦是袂曉。總是有人相教學，變技巧，才開始相賽咬！
　　兩頭放蟋蟀，對孔趖入去，中央相拄搪，看袂順眼起狂屹，「窸窣窣」的聲，動開火煨仔殼，目對目，雄介介，直爭去，牙桮咬牙桮，頭抵頭拚命，真真「相拍恨無力」，咬矣不分離煞。
　　囡仔話一句來一句去：「鳥龍欸！烏龍力，咬矣對敵翻身反；赤薑欸！赤薑膽，拚生拚死伊真敢；鐵板欸！鐵板識，看毋是勢走第一。」精精是囡仔目識好，色水看清楚，花紋會分款，久來知性地。只用三句話，蟋蟀的生性，講矣誠褿全。當年囡仔話，經過六十外年來，亦是記矣牢牢牢！
　　蟋蟀即咬贏，見人就去品，輸者有話講，理由家己編。即句俚語「六骹全鬚」，真是難哦！講著蟋蟀：「憑勇咧相爭，折骹的折骹，斷鬚的斷鬚，破翅的破翅」，一年才出一隻「蟋蟀王！」
　　註記：赤仔埔、埔頂，指的是后湖地名。