俺公工課作好矣！相招俺媽作一會，樹骹擛扇作仙仙，伊毋去，為結雞仔緣。
招雞仔囝，叫聲呼「諸諸」，撓喳喳來規垺，當掖麥粟，規會赫赫趒綴一拖，啉水毛沐著澹，欲焦離隨身拌閣颺。有咧大，無若久，成雞桃仔，大埕披舊安簽日咧曝，趖踹蛀蚼，雞咧啄誠是捌；深井石枋頂的豆醬甕，日曝燒燒，蟲擋袂牢撓撓趖，一尾一尾交落落，供食飽穩當有，誠是好貨！身體通補補。當青春，雞僆仔，四界去，輕跳跳，若是枵，蹆到門口，米粟已經攢好好，從來攏袂「枵饑失頓」。
當咧大探視外景，感覺奇奇！園亦去，溝亦蹯，骹去耙，出爪拑，愛拍翸毋知生翼若好用？一搗閣一搗，欲飛懸無才調，囡仔講伊假會曉，敢是當大就會嬈？俏雞角雄介介，罩來無塊閃。囡仔「拍邊鼓」出聲：「雞角過頭雄，雞母驚驚死！」毋知彼兩隻雞的心理，創出生傳的代誌！
大隻時央生卵，俺媽指指抵入雞尻川，拄著粒滑滑，就知今兒日會生卵，準準準！有時兒看無卵才是業，俺母工課贅矣！像「雞母拖秤砣，規日硞硞遨。」厝邊阿嬸愛說笑，總會唸：「咯咯雞！咯咯雞！新婦叫大家，大家揣無卵，出門就去問。」即時揣矣「心狂火著！」孫仔偎來插嘴：「阮身軀瘦挲，好勢鑽入縫」，草間門扇圈，雖然有縛索，但是中央留一大縫，軁入去看嘜！佇頭前見著草仔窩，白卵一垺，揣著啦！緊提盆仔門前等，一粒一粒送出去，外口亦接亦數，接近頂水的數量，安爾就著！有通換油換麵線，會使食補顧身體。俺媽笑咍咍，孫仔卡實「有二步七矣！」
壁骹邊大箍番薯，雞啄矣！一空紲一空，成一種心適代；西瓜皮啄矣！規會是「貓貓蛀蛀」賰一層皮，謳咾雞：「喙尖夠厲害！」暝時吤吤叫，俺媽驚甲開大門緝出去！看無雞仔賊，是過路人孽孽，石頭亂恣擲。「雞目睭」暗時就看無，返原位真費氣，拍翼扴來扴去，等到靜棲棲，喙數掌頭仔比，雞隻無減才放心。
搪著「毋誠雞仔放白屎」，當作否運換飼新料；「著雞瘵」是天大的煩惱，昨日規會活跳跳，今兒日贅贅死翹翹，賰無幾隻；「放雞恭」臭摸摸，先坱沙才挨掃清氣。真正是「工課神」，病身雞仔出各樣，伊去醫治，呼伊是「雞的先生媽！」
幫雞仔生澶，俺媽記牢牢，足夠頂真！孫仔來表示，歡喜拍拍唸歌謠：
〈好相承〉
　　俺媽用心神，雞卵照有雄。蓆草鋪好勢，雞卵提來憩。雞母伏咧孵，二十一日久。雞仔嬰生踹，看矣暢忽忽。窩燒顧雞囝，暗暝有保領。撓喳喳離岫，啄米創啥樣？澹糠作一垺，啄矣噴身軀。米粒掖大位，啄矣離開開。東西南北掖，成形四個額。掖粟好工夫，深井跳雞舞！
誠有雞仔情，唸雞仔歌真興，出聲有意思！搪著哭景，一個囡仔，戲弄紲落唸：「愛哭仙，偎門圈，門圈較較倒，死雞仔死袂好！」愛哭仙汰討會生笑面？俺媽換歌款：「挨矣挨！載粟載米來飼雞！食雞欲物代，飼欲叫更，飼狗欲吠暝，飼後生有孝齊，飼查某囝別人的，飼新婦顧大家，飼老媽欲紡紗。」隨身就起舞，一手伸一手勼，拖拖拔拔，兩人當頭對面，弄矣嘻抐嘻！
閒仔時，囡仔招俺媽來唸屹：「掩咯雞，走白卵，一粒食，一粒吮，鳥鼠仔囝覕密密，苦雞母去揣賊，揣若有，共你拄，揣若無，放你食屎去佚陶！」掩著目睭的囡仔，俺媽佇後壁共伊捒出去，掠人當作趣味，箍內有閃有避，即予伊拍著，角色對調重新來，一過紲一過，規晡攏袂僐。
邀雞仔有緣，知影雞仔性，作齊常抦款，呼雞雞會動，叫雞雞會來，唸雞的孤歌仔，真精彩！樂觀的俺媽講：「飼雞本興興，育雞作頭先，顧雞真心適，有緣來生情！」