（１）
過暸年，五十歲啦

聽講，查甫人一世人愛做一遍生日
吃老才有好光景甲真讚的老運
從五十一歲開始做起
六十一歲七十一歲一直到百歲
每十年攏是吃豬腳麵線的日子

聽講，查甫人五十一歲生日
外家頭彼邊愛做
無豬羊，也愛有麵線蛋
尚少也愛有三千六介紅包壓紅

聽講，外家頭壓紅的紅包袂凍拿
擱愛墊錢包還伊
空的紅包袋仔
留呼自己
（２）
心情稀微的三十暗暝
毋免算也知影無外多的寄金簿仔
無夠分。給囝仔的紅包
今年一定愛縮水，為著面子
給外人的紅包照常支出？

過年前，工廠煞來關門
月給領無毋要緊，年終獎金也免想
頭家走路，我也跟伊走路？

鬧熱滾滾的電視新聞
看到甲我逗陣上班的阿財
擲雞蛋，頂個月才買厝的松仔
為著頭路也惦惦流落目屎

阮覓在厝裡
親像賊仔無臉出去見人？
窗外的炮仔聲
親像阮抽痛的心情
聲聲彈

想要哮，又擱哮袂出來
（３）
過暸年，五十歲啦
心內有淡薄仔疼

今年是初五也是初六開工
是不是愛翻農民曆看時看日
已經毋免計較？
阮的人生什麼時陣開工
無人知影，計較無路用

毋知你惦介工廠
是毋是有欠臨時工？
（４）
夢已經堅持幾落冬
酒，卡辣也愛吞落去
惦惦承受一層一層講袂完的
心事。因為傷心介代誌
攏總是冷冷的目屎
順手
擦
乎
乾
　　　　　　　　　　
註一：景氣低迷，中年失業者多，面臨家庭生活的壓力，許多人都咬緊牙根苦了過來，等待來年的出運。
註二：過暸年：過了年。真讚：很好的。
外家頭：太太那一邊的人。留呼自己：留給自己。
暗暝：夜晚。寄金簿仔：存款簿。
惦惦：沉默，靜靜。炮仔聲：鞭炮聲。
淡薄仔：一點點。卡辣：辛辣。