給阿母的話 ◎倪振土
阿母
看著汝的相片
不敢相信汝已經過去
汝的面容 猶原親切
讓阮想起卡早的代誌

古寧頭 紅花好名 人人探聽
嫁給金門城作事兄
風雨多大 汝攏不驚
上山下海 作未定

一手拿割仔 一手牽大兄
懷中抱阮 背後央細子
養豬耙草 無閒堂廳
日頭落山 燒灶舉鼎
輕喚阮的名

阿母
汝 甘願自己來吃苦
不甘子兒來受苦
讓阮平安順遂
惦惦仔大漢 結婚擱娶某

阿爸先走
汝猶原堅強 扶起這口灶
半暝仔 替兒蓋被煮豬料
孤單形影 心內不敢哭

阿母
汝的教示
讓阮正人成氣、安分守己
汝叫阮兄弟
要懂道理、要相互扶持
阮不敢放未記…

今天讓子兒跪在汝靈前
叫汝一聲阿母

沒汝的照顧
親像 孤帆沒依靠
風雨飄搖 找無路

日落西山 孤雁哀啼
枯樹乾枝 月娘空照
哪知影 以後沒阿母倘叫

恩情天大 思念長久
后世人 希望能夠作汝的子兒
擱叫汝阿母…

給阿嬤的話 ◎倪君凱
阿嬤
今天清風微微
讓阮想到蘆穗纍纍的那幾年
汝常牽著細漢的阮
走過田墘…

在佛祖間
阮合掌跪向神明 目稠金金
汝輕扶阮的雙手 循循的念：
保庇平安順遂能讀冊
貴人在身邊 壞人撥一邊

天還沒光 汝就起床
燒香點火煮一鍋蕃籤湯
惦惦仔等阮吃完
站在門口 看阮去學堂

讀書考試 汝替阮打金牌 點光明燈
艱苦破病 汝為阮四處走衝 問神燒金
吃不下頓 因為不甘阮去作兵
睏不入眠 因為煩惱阮的婚姻

日到年尾
汝在古厝燒灶傳傢伙
白煙罄罄 炊紅龜粿
天寒的時
汝數著日子願望過年
站在門口 等阮回來搓紅圓…

阿嬤
阮漸漸大漢 汝頭髮也漸漸白
受盡風霜 單薄形影 汝攏沒怨嗟
日夜操勞 為了子孫 汝甘願付出一切

阿嬤 阮的心肝嬤
汝千求萬拜 就是沒替自己打算
看汝面肉消瘦 甘知影阮心頭多酸

現在汝身體快活了
回去找佛祖的路 汝要走好
腳若酸 汝就坐下不通忍
到了天上 好好休睏
不通煩惱阮…