「阿爸，我較早已經共你講過啦，有一日你若死，我會共你辦佫真鬧熱，予你風風光光上山頭。」
　　「你真有孝，」跛跤膨豬一陣詭譎的冷笑，「你的孝心天公祖有咧看，咱龕內的祖公祖嬤也有咧看，但是我毋敢數想、也毋敢領受啦！」
「阿爸，若是到彼日，你著事先共我講，你賰的錢銀囥佇陀位，若無，到時欲叫我去陀揣。」
「你想欲知影是毋？」跛跤膨豬故意地問。
　　「我是你的囝，當然嘛想欲知影。」貓仔馬俊期待著。
　　「囥佇恁祖嬤的墓坑內啦！」跛跤膨豬火氣十足地說，「你即日無想啥物，拄拄數想恁爸的錢銀！」
　　「阿爸，你袂使按爾講的，」貓仔馬俊理直氣壯地，「爸母若是死去，錢銀當然嘛是留予該己的囝孫，毋敢講欲留予別人。」
　　「你講的雖然無毋著，但是照我的看法是按爾啦：送予一個有路用的人，較贏留予一個不爭氣的了尾仔囝！」跛跤膨豬憤慨地說。
　　「阿爸，我毋是一個像你想的彼種了尾仔囝，你若是死，共錢銀留予我著無毋著；初一、十五，我會共你燒香點火，過年過節，我一定會共你拜佫真鬧熱。尤其是你上愛食的『金針湯』佮『木耳膨卵』，我一定會記囥心肝內。阿爸，按爾你毋知有滿意無？」
　　「我滿意，我非常的滿意，飼著你這個有孝囝，我敢抑擱有啥物通袂滿意的。」