「阿爸，誠實的呢？」貓仔馬俊興奮地，「阮朋友鳥鼠清仔伊有咧招我，看我有欲湊陣去佚陶無。」
　　「有伴湊陣去行行看看的也好，田內的穡頭是永遠做袂完，作穡人若欲等佫有閒工，永遠毋免數想欲出門。」跛跤膨豬坦誠地說。
　　「阿爸，你若欲予我去，我著欲去準備像頭通辦手續。」貓仔馬俊說後頓了一下，「厝內的事志毋知你有法度通發落無？」
　　「去啦、去啦，少年人出去行行看看啦，厝內的事志我會該己來發落，毋免你煩惱啦！」跛跤膨豬率性地說。
　　「阿爸，聽講旅費著二萬外箍。」貓仔馬俊似乎有點擔心。
　　「二萬外箍著二萬外箍，抑毋是咧開袂起啦！」跛跤膨豬無所謂地說：「時機無仝款啦，錢沓沓仔薄去了，這陣二萬外箍已經無算啥物，若是欲搰力去拍拚，欲趁二萬外箍也是三兩下半，僅驚是驚貧憚又擱欲食毋討趁。」
　　聽到「貧憚又擱欲食毋討趁」這句話，貓仔馬俊隨即羞愧地低下頭。
　　「除了旅費二萬外箍，你著擱帶淡薄仔囥佇身軀邊通用。」跛跤膨豬叮嚀著說。
　　「有地食，有地徛，毋免帶傷濟錢啦。」
　　「出門毋比佇咱兜，加帶一點仔有時通用，用賰的才擱帶倒來也無加工。若是到時欲用錢才去共別人借，按爾著歹勢啦。」
　　「阿爸，你講的也是著啦，咱桌屜內抑擱有三萬五的賣豬錢，我還未提去銀行存。這錢除了旅費外，抑擱有萬外箍，我攏總共伊帶囥身軀邊，用賰的才帶倒來。」
　　「按爾著著啦！」
　　「你敢有欲買啥物？」
　　「無啦，講實在的，這陣交通真利便，街路店頭逐項有，若有錢，欲買啥物物件攏嘛買會著，佮古早完全無仝款啦。」跛跤膨豬說後搖搖頭，又感歎地說：「從民國三十八年國軍撤退了後，兩岸著袂通，共匪又擱用大砲來拍咱金門，予咱百姓損失真悽慘。」
　　「人講戰爭真正的輸家，攏是咱百姓人，實在無毋著。」
　　「從九三、八二三到六一七這三次砲戰，死傷的人佮畜牲實在算袂清。誠濟老大人若講起這段歷史，心肝頭這口氣，擱較怎樣嘛吞袂落去。」跛跤膨豬有感而發地說。
　　「時機咧變實在予人想袂到，聽講較早兵仔若咧點名，攏嘛唱『打倒俄寇反共產，消減朱毛殺漢奸』佮啥物『大陸是我們的國土，大陸是我們的家鄉，我們要反攻回去，把大陸收復』，若是以這陣這種時勢來講，誠實真好笑。」