「較早徛佇咱鄉里彼北貢兵，攏嘛老神在在咧講，蔣總統從大陸帶伊出來，一定會擱帶伊倒去。可惜一等幾十年，有誠濟袂等的北貢兵攏嘛死咧台灣。上可憐的是，連彼個蔣總統伊爸仔囝嘛去做佛啦，毋免數想會帶伊倒去！」
　　「阿爸，這種著是大時代的悲劇，俗語話講『人算不如天算』，實在有伊的道理。這陣離和平的跤步已經誠近啦，聽講誠濟退伍留咧台灣的老兵，攏嘛相招倒去大陸探親。幾十年無見面的親人，相見時逐個攏嘛歡喜佫流目屎。」
　　「你講的這我會理解，人生上可貴的著是親情，親情嘛無啥物通代替的。像咱即種爸囝情，嘛毋是一日兩日建立起來的，是經過二三十年的瞭解，才有今仔日。」
「阿爸，講著爸囝情，我誠實真對不起你。較早毋捌想，做誠濟毋著的事志，予你咧氣疼佮煩惱。這陣認真想想的，實在誠見笑。」貓仔馬俊極其感性地說。
「過去的事志著予過去，這陣會曉通思過，會曉重新來做人，算起來抑擱袂晚啦！講實的，祖公留落來的田園厝宅也袂少，我食會老，嘛帶袂去，將來這田園厝宅攏總是你的。你若毋捌想，毋搰力去拍拚，放予伊荒廢去，除了可惜外，嘛對不起咱祖龕內的祖公祖嬤。」跛跤膨豬微歎了一口氣，又繼續說：「這幾年來，咱攏感受會著，從你收心改過了後，安安份份佇咱兜共我湊相共，無論五穀佮番薯芋的收成，抑是菜豬佮雞鴨賣的價錢，會使講比較早好誠濟。這是天公祖
咧疼惜咱，咱著會曉通感恩。雖然我趕緊欲共你做一個親情，予你有一個家口，我嘛通抱孫。但是這種事志誠歹講，可能是緣分還末到，才會拖到這陣抑無消息。」
　　「阿爸，娶某的事志沓沓仔來，毋免趕緊啦！」貓仔馬俊有些不好意思。