「你誠豬哥神，你會想某想佫起 。」鳥鼠清仔開玩笑地說。
　　「我毋相信你袂想。」貓仔馬俊反駁他說。
　　「佇大陸彼個大所在，若是有錢，毋免驚娶無某啦！」
　　「若是像你講的按爾，你怎樣毋娶？」
　　「毋驚你貓仔馬俊笑啦，」鳥鼠清仔神氣地，「大陸有三十五省，等我佮無仝省份的查某試過才擱講。」
　　「莫臭屁啦，三十五省三十五個查某，若是按爾，你比我擱較豬哥神！」
　　「講笑啦！咱攏仝款，某緣抑未到，只好三不五時仔，揣機會就近來去廈門消透消透的。」
　　「講著廈門，我著想起妞妞……。」
　　「古早人講『婊子無情』，伊愛的是你的錢，毋是你的人，這點你著分予清楚。講一句較歹聽的，爽過著煞煞去，趁食查某無啥物通好數念的，千萬毋通眩船啦！」
　　「我雖然放蕩一段時間，留一個歹名歹聲的了尾仔囝名，但是拄限佇咱這個小所在。外口誠濟事志佮社會這門課，跟你鳥鼠清仔比起來，無一箍尾逝啦。」
　　「社會經驗是一點一滴沓沓累積起來的，當咱的思想成熟時，對較早所做的事志，會感覺誠幼稚、誠好笑。」
　　「你講的佮我心內所想的仝款，但是往往誠濟事志攏是憑一時的衝動，親像去予魔神仔迷去彼一樣，該己無法度通控制，才會造成誠濟無法度通挽回的憾事！」