「生理有生理跤數，你敢有適合？」跛跤膨豬疑惑地。
　　「俗語講『事在人為』，世間無天生的生理人佮作穡人，啥物事志攏著用心去學。我較早毋捌作穡，但是這幾年來，我用心跟阿爸學，這陣無論犁田打股種番薯芋，抑是擔肥、擔糞、撥豬尿，我逐項攏會曉。阿爸你有親目看著，毋是我該己咧臭彈講大空話。」
「對天講話，這幾年來你實在改變誠濟，我除了歡喜外，嘛充分的信任你，一屑仔錢銀嘛交予你佇保管。若是緊娶一個新婦，共我生一個戇孫來延續咱楊家的香火，我跛跤膨豬這世人著無啥物通怨歎的啦！」跛跤膨豬有感而發地說。
「我知影阿爸你有叫媒人咧共我做親情，可能是我較早歹底，才會予人嫌。這陣時機無仝款啦，誠濟人攏去娶印尼、娶越南佮娶大陸的新娘，娶來了後，一個一個攏嘛賢慧有孝，照常生囝生孫、傳宗接代。我若有機會去廈門做生理，緣分若到，無定著真緊著會娶一個大陸新娘，到時會使共阿爸接來去廈門湊陣徛，予囝新婦來有孝你。」貓仔馬俊打著如意算盤。
　　「我雖然無讀冊，嘛毋是一個無講理的老古板。恁少年人有恁少年人的看法佮想法，只要規規矩矩搰力認真去拍拚，猶原會拚出一片天。若是像你較早貧憚欲食毋討趁，萬貫的家財也會匪了了。但是無論做啥物事志，攏著用該己的頭腦，三思了後才行，千千萬萬毋通虎頭鳥鼠尾。尤其你已經是一個三十歲的大人，無管做啥物行業，拄會使成功、袂使失敗。」跛跤膨豬苦口婆心地說。
「阿爸，較早赫幼稚無水準的大空話，我毋敢佇你面頭前擱講啦。這幾年來，我深深的領悟到，少年人無論做啥物事志，一定著求實際，袂使像成語講的『好高騖遠』。阿爸，你講我的看法著無？」