「阿爸，赫鱸鰻毋爾鴨霸，若是毋聽伊的話，舉刀舉槍欲拍予人死才恐怖喔！」
　　「土匪，無王法啦！」
「共產黨的社會著是按爾。」
　　「你明明知影共產黨的社會是按爾，物代偏偏想欲去彼邊做生理？這聲好啦，錢銀白白了去啦，恁爸的棺材本也跟你去啦！飼你這個無潲路用的了尾仔囝，你會予恁爸怨歎一世人！」跛跤膨豬氣憤地說。
　　「阿爸，你毋通受氣，我一定會搰力拍拚趁錢來彌補。你千萬著保重身體，毋通煩惱，錢是身外之物，有人著有錢啦！」貓仔馬俊安慰他說。
　　「講的比唱的較好聽！」跛跤膨豬不吃他這一套，狠狠地瞪了他一眼，「大人大種，抑擱予恁爸咧氣疼，枉費恁爸飼你赫大漢的苦心！」
「阿爸，我毋著，我該死，我目睭展無金才會予人騙去。我共你跪落去好無！」貓仔馬俊說後，竟然真的雙腳跪地。
　　「起來！」跛跤膨豬聲音震耳，「男子漢大丈夫，敢做敢擔當。雖然錢銀毋是赫好趁，若是欲搰力去拍拚，又擱會曉通勤儉，欲賰幾篩銀仔也毋是無可能。查甫人著有志氣，毋通規身軀死了了，拄拄賰彼支喙抑未死。若袂曉通思過又擱毋捌想，跪死佇塗跤也無人會可憐！」
　「阿爸，你的話我會記咧心肝內，我共你保證，這過予人騙去的錢，我會做牛做馬來拖還你。」貓仔馬俊信誓旦旦地說。
　「你毋免共我保證，你的金言玉語我聽誠濟遍啦，你毋做人袂要緊，但是我跛跤膨豬抑擱欲佇這個鄉里佮人徛起！少年人無論做啥物事志，攏著跤踏實地，毋通數想欲一步登天，若是按爾是穩死無活的。