「你敢有去看醫生？」鳥鼠清仔關心地問。
　　「有啦，經過打針吃藥，已經好啦。」貓仔馬俊再次地感到羞愧，不禁搖著頭說：「見笑事啦！」
　　「講笑規講笑，實際上無某無猴的查甫人去開查某，認真講起來也無啥物大不了啦！但是該己一定著注意，菜花佮檨仔有藥通醫，若是著到梅毒佮愛滋病，彼聲著大聲啦！」鳥鼠清仔提醒他說。
　　「你敢捌著過鏢？」
　　「這逝風流路若是欲行，毋免驚袂種菜花、生檨仔，我兩項經驗攏有過，見笑事啦！」鳥鼠清仔竟也有點不好意思，「以後著較規矩的，若是娶某了後，這逝路千千萬萬毋通行。毋通學老枝伯仔彼個風流鬼，一個某、一個湊頭抑擱嫌無夠氣，竟然擱去揣趁食查某，誠實是老不修又擱老風流！」
　　「伊咧批評別人精霸霸，俗語話講『有喙講別人，無喙講該己』，啥人毋知伊是一隻老豬哥。外口物事會知影我予人騙去又擱著鏢，一定是伊四界宣傳、四界講，才會規四山坪攏知影。若毋是帶念著伊歲聲赫爾大，依我的個性，伊娘較好咧，我一定欲揣伊算數！」貓仔馬俊憤慨地說。
　　「人講『歹瓜厚籽，歹人厚言語』莫擱去插彼隻老豬哥啦。你該己千萬著注意，草包性地著徹底改一下，毋通擱去惹事生非，共恁老爸留一點仔面子，毋通擱予伊怨歎佮氣疼。」鳥鼠清仔開導他說。
　　「認真講起來，阮老爸實在有夠可憐事。食，毋成食；穿，毋成穿；睏，毋成睏，一日到暗做半死，連年兜嘛無通歇睏。我看伊這世人上怨歎的，毋是阮老母跟兵仔走，也毋是作穡做半死，是飼我這個不爭氣的了尾仔囝！」
　　「貓仔馬俊，經過赫濟事志，你今仔日總算覺悟啦。徛佇朋友的立場，我也有必要來苦勸你：人，毋驚失意，盡驚驚失志！你這陣才三十出頭，若欲認真搰力去拍拚機會真濟；你老爸這陣身體還算勇健，欲有孝伊抑擱袂晚，俗語話講：『在生予伊食一粒塗豆，較贏死後孝一個豬頭』。你若是毋徹底改過，欲繼續放蕩落去，時間一去不回頭，機會錯過袂擱來，你貓仔馬俊這個了尾仔囝的臭名，也會永遠佇咱這塊土地留名！」