某年某月某一日
福建金門某人士
好名好聲娶新婦
歡歡喜喜辦喜事
印來請帖無數張
張張紅紙燙金字
電腦列名免費時
東南西北滿天飛
親像秋風掃落葉
滿山遍野攏總是

府會社團局處室
政府官員人人有
咱的鄉親毋免講
東村西村到下莊
山西山前到庵前
水頭浦頭到塘頭
泗湖后湖到下湖
湖下湖尾到沙美
無管是一面之緣
抑是點頭的初交
張三李四佮王五
罔飼罔育佮罔抾
小姐先生攏有份
查甫查某統統請

玫瑰餐廳湘味館
川東飯店萬福樓
大細房間攏擺桌
紅包包濟無氣嫌
有魚有肉有腹內
羊肉麵線芳絳絳
鮑魚豬跤氣味好
糯米蟳飯真好食
也有生魚搵芥辣
鄉親序大免客氣
親情朋友免行禮
千萬恁著食予飽
燒酒逐家沙米思
毋是小氣驚恁淋
警察徛佇門跤口
萬一予抓去歕氣
彼聲恁著知通死

向東的彼一塊桌
雖無深交誠熟似
十二塊椅坐六個
紅包一人四百四
明明欲創予我死
菜錢一桌三千六
高粱淋去二酐外
酒拳過癮划袂煞
一枝噴噴兩相好
四季發財五進魁
六六大順七七巧
八仙過海九九怪
伊贏拳來我輸酒
攏無替我想看覓
若是逐桌這款樣
有失體面也了錢
擉擉算盤詳細算
算來算去算無盤
抑是毋通請卡贏

靠西的彼一塊桌
人人西裝油食粿
面無表情眼觀天
一目看出是官員
局長處長佮主任
所長廠長佮隊長
啥人敢毋扶膦芭
若是予我袂滿意
一定對伊無客氣
掀起禮簿來看覓
伊的禮數合我意
紅包一人包萬二
免講我嘛笑咪咪
一五一十來算起
這塊桌才有趁錢
予我心內真歡喜

門口已經咧放炮
酒席真緊著煞去
人抑沒走先訐譙
請客請客請啥潲
魚無新鮮肉無爛
大陸羊肉韌痡痡
麻油麵線爛糊糊
排骨炊芋鹹死死
紅燒雞無味無素
桂花丸湯冷吱吱
鳳梨湯無摻粉圓
燒酒毋甘予人淋
麥茶趕緊提提去
雜菜雖然賰真濟
現現放佇灶頭邊
胡蠅蠓仔嗡嗡叫
枵鬼去食穩落死

金門所在真正細
處處需要咱關懷
政客錢銀賰真濟
應該帶頭做示範
濟貧救苦排第一
服務鄉親列優先
社會人士名聲響
著做少年的榜樣
敬老尊賢教子弟
關心地方的發展
若是誠心結善緣
請請鄉親算啥物
錢銀雖然人人愛
毋通藉機想發財
人著有品擱有格
才袂予人看衰潲
才袂予人看衰潲

　後記：
「紅色炸彈」滿天飛，一直是這座島嶼的詬病。尤其是某些「有頭有臉」的「社會人士」和「政治人物」，他們經常藉著各種名目，美其名是請客，然而，真正的目的是什麼？善良的鄉親焉有不知情之理，只是恥於揭穿他們虛偽的面目而已！
本詩作於二○○五年九月，純粹是針對時下的歪風陋習有感而發，並沒有特定的抒發對象，請勿對號入座。冀望讀者們能以欣賞「咱的故鄉咱的詩」的怡然心境，用閩南語把它朗誦出來。當您意會到詩中的含意而產生共鳴時，請會心地一笑，對於詩中虛構的人物和情景，毋須加以臆測和聯想。