「伊心情無好啦。」華章說。
「是啥人得罪伊？抑是欠伊？」烏番嬸毫不客氣地問。
「伊看咱這個所在袂慣勢啦。」
「袂慣勢？」烏番嬸不屑地，「俗語話講：嫁雞綴雞飛，嫁狗綴狗走，咱這個所在經過幾落代人，出丁無數，無一個敢嫌，伊咧嫌啥物空？敢講你是去予伊招囝婿？伊才會赫呢敢死嫌東嫌西！」
「俺娘，妳毋通擱講講赫啦，我真煩哩！」華章不耐煩地說。
「你煩，我比你擱較煩！」烏番嬸激動地，「好名好聲娶這種新婦，予人袂探聽得啦！」
「伊是大學生呢，生了嘛袂歹看，又擱佇政府機關咧吃頭路，一月日嘛領袂少錢。有這款好新婦，妳應該著感覺誠歡喜、誠驕傲才著，哪會使講予人袂探聽得！」華章辯解著說。
「你毋通搬赫大道理來疊我這隻青瞑牛。我毋是咧講你，你四年大學開去厝內偌濟錢？畢業了後食頭路趁偌濟錢？你敢有寄一箍銀仔倒來咱兜，通予我家事相添用？完全無共序大人看佇目睭內，你這款做法實在予我誠凊心。」
「俺娘，妳毋知啦，佇台灣彼個大都市，目睭展開逐項攏著錢，無親像咱兜生活水準赫呢低，食蕃薯糜配菜脯著會使過一頓。而且咱兜嘛無欠錢用，我才會無寄錢倒來啦。」
「你講的雖然無毋著，但是你毋通袂記咧，恁老爸規年通天倒佇眠床頂，恁小弟頭殼又擱無精光，咱兜拄拄靠我這把老骨頭啦，若是逐人像你這種想法，飼囝敢抑擱有路用？」烏番嬸依然激動地說。
「俺娘，妳毋通氣啦。等有一日妳若老、袂作穡，親像阮爸倒咧眠床頂，彼陣我才寄錢倒來飼妳啦。」