那晚侍候好父親，槌哥和春桃關上房門準備睡覺時，但卻沒有一點睡意，於是兩人倒在床上閒聊起來。
「槌哥，你實在有夠勇得，一日作穡作半死，倒落眠床又擱想空想縫，敢袂傷疲勞？」春桃輕輕地擰了他一下臉頰，笑著說。
「春桃仔，較早有較戇啦，頭殼想的是佮妳湊陣做、湊陣食，完全無想著會使佮妳湊陣睏。咱這陣已經是一對合法的翁仔某，兩個睏咧一張眠床頂，三不五時擱會使來親熱親熱、溫存溫存得，予我得著真大的安慰。春桃仔，講實得，我毋爾袂疲勞，每一次佮妳親密過後，毋知物事，我的精神感覺擱較好。」
「敢有影？」春桃興奮地問。
「我袂騙妳啦。」槌哥誠摯地說。
「可能睏久著無稀罕啦，食老嘛會予你嫌。」
「我袂按爾想啦！咱兩個會當湊陣做、湊陣食、湊陣睏，講起來也是一種緣分，食老擱較著互相照顧，親像俺娘照顧俺爸彼一樣。」
「槌哥，想袂到你捌的道理赫濟，實在予我誠意外。」
「我該己嘛想袂到，聽俺娘咧講，我細漢的時陣毋爾戇戇，又擱槌槌，不時咧予人欺負。大漢時嘛毋是誠精光，講話又擱會重句，是一個標標準準的槌哥。想袂到從阿生兄死去了後，阮俺娘三不五時叫我去共妳湊相共，受到妳春桃的開竅，佮該己沓沓來體會，這陣毋爾袂重句，而且嘛捌淡薄仔世事。有時我該己咧想，除了著感謝妳，我相信將來咱若是生囝，一定袂戇戇，也袂槌槌，會親像阮阿兄赫爾巧，去台灣讀大學。」
「槌哥，你毋免感謝我啦。若毋是你細漢的時陣發燒，你定著會親像恁阿兄赫爾巧，讀真濟書，若是按爾你著會去娶別的查某。話擱講倒來，若毋是阿生早死，咱也袂湊陣做、湊陣食、湊陣睏，最後結成翁某。會使講啥物攏是緣分佮命啦。槌哥，你講的無毋著，因為你毋是先天的戇，是生出來才受到影響，將來咱生的囝，一定袂戇戇，也袂槌槌，無定著大漢會做大官、趁大錢！」
「春桃仔，咱毋是不時咧親熱，物事抑擱無看著妳的腹肚大起來？」槌哥不解地問。
「這種事志誠歹講，嘛毋是不時咧親熱著會大腹肚，著看時機是毋是有拄拄仔好。莫趕緊沓沓來啦，毋通袂記咧，咱抑擱少年，若親像你赫爾勇，又擱赫爾有擋頭，無定著年頭生一個，年尾又擱生一個，到時看你欲用啥物來飼囝？若著抱去寄和尚飼，彼聲著見笑啦！」
「妳毋免煩惱啦，若親像咱這陣赫爾拍拚，毋爾飼會飽，嘛有才調通培養。春桃仔，咱應該著較常親熱得，趁少年緊加生幾個仔，有的通顧咱這爿，有的通顧阿生彼爿，兩爿的香火攏袂使予斷去，才對祖公有一個交代。」
「槌哥，講著眠床頂彼項事志，你是閬時無閬日，我是強欲擋袂牢，敢講你抑擱無夠氣？」春桃笑著說，復又嚴肅地，「講笑規講笑，你想的無毋著，做人袂使自私得，雖然阿生已經去做佛，阿秀仔又擱是一個查某囡仔，將來咱若是生兩個查甫得，一個顧彼頭，一個顧這頭，兩爿的祖公攏著顧，傢伙各人得，才袂予人講閒話。」
「咱兩個的想法差無偌濟，實在著加生幾個仔，才對得起兩爿的祖公。」槌哥說後，一把把春桃摟進懷裡，輕聲地說：「春桃仔，時間抑早得，咱擱來溫存一下好毋？」
「三八，這種事志著擱問，每一次我若講毋、喊倦，你嘛是強強共我騎起，有時予你疊甲強欲袂喘氣。」
「白賊，有時我明明聽著妳怦怦喘，又擱啍啍呻。」
「槌哥，你欠拍是毋？」春桃不好意思地擰予他一下臉頰，「正經話毋講，專門講講彼五四三得。這項事志毋通講予人聽著啦，若無會見笑死。」