「你人佇台灣，阿爸的喪事又擱袂使拖得，我是欲怎樣佮你參詳咧？」槌哥有點激動，「講實在得啦，每一項事志我攏有問俺娘，而且咱嘛著尊重來共咱湊相共赫鄉親序大。」
「講講赫六空得，錢是咱的，咱欲怎樣開就怎樣開，敢會使予伊來替咱拍算。」
「咱鄉里赫鄉親序大，無管好歹事志，攏義務共人湊相共有著，咱著信任人、尊重人，才袂對人歹勢。」
「你是咧教訓我是毋？」
「阿兄，你哪會按爾講？」
「這攤數是你經手得，你著一條一條算予我看、讀予我聽；若無者，毋免數想欲叫我出錢。」
「阿兄，按爾好啦，阿爸這攤是阿土伯共咱扞頭得，我來去請伊來共你解釋。」
「毋免！你共我解釋就好。」
失去老伴的悲傷心情尚未平復的烏番嬸，在屋內聽到華章如此地無理取鬧，心中的怒氣再也按捺不住，於是她跨步走出來，責問華章說：「你是欲倒來送恁老爸？抑是欲倒來亂得？」
「俺娘，妳哪會按爾講？」華章理直氣壯地，「人講親兄弟明算數，我按爾問敢有毋著？」
「你著、你著、你著！你書讀咧加脊骿啦！」烏番嬸氣憤地，「恁老爸做牛做馬佇拖磨，儉酸苦漸培養你讀大學，你摸摸良心看覓，恁翁仔某敢有盡著囝新婦的責任？」
「我佇台灣嘛是認真咧拍拚。」
「你是為啥物人咧拍拚？敢是為這個家？敢是為爸、為母、為兄弟？你摸摸良心看覓，恁老爸破病倒咧眠床頂幾落年，你有寫一張批來關心伊無？你有寄一箍銀仔來飼伊無？枉費你是一個大學生啦！」
「阿爸有妳佮槌哥通照顧已經傷濟啦，毋免輪到我啦！」
「你講這種話敢有天良？敢毋驚去予雷公敲！」烏番嬸氣憤難忍地說：「恁老爸若毋是你彼個戇小弟，暝日咧共伊飼糜，咧共伊捏屎捏尿，老早著去天頂做佛啦，敢有通活到今仔日等你這個有孝囝倒來送伊。」
「妳莫擱講講赫五四三得，好毋？老實講啦，今仔日槌哥哪無共赫數算予清楚，我是一箍銀攏毋出，到時毋通怪我不孝。」
「無咧稀罕，人咧做、天咧看！」烏番嬸聲音震耳，「恁小弟雖然戇，但是戇囝毋爾會飼老爸，也有才調通埋老爸啦！」