「你講的也是有影啦。恁阿嫂無通予我倒來，我嘛是強強欲倒來，才袂予人講不孝。」
「咱鄉里拄拄你讀過大學，若是毋知影這字『孝』字，實在無人欲相信，嘛會予人笑。古早人講：『生前予伊食一粒塗豆，較贏死後拜一個豬頭。』咱老爸已經死啦，想欲有孝也無機會啦。」槌哥一語雙關。
「咱莫擱講赫，你算看覓，阿爸出山彼日，鼓吹錢佮師公錢攏總偌濟？我通算予你。」
「毋免算啦。」槌哥爽快地說。
「物事毋免算？」華章緊張地問。
「阿兄，我雖然戇擱槌，但是你的困難佮你的孝心我感受會著。這遍阿爸過身所開的錢，全部予小弟我來出。你想欲出的鼓吹錢佮師公錢，倒去台灣了後，緊提去囥銀行生利息，通買厝佮買車。」
「按爾歹勢啦。」
「咱是仝爸仝母生的親兄弟，無啥物通歹勢得。」
「老爸死去，我無出半箍，是毋是會予外口人講閒話？」
「你毋免煩惱，人咧做、天咧看，我袂四界講啦。」
「若是按爾我著放心啦。」
「講實得，你長久徛咧台灣，若是有人講閒話，你嘛是聽袂著。」
「講起來也是有影，等咱傢伙佮田園厝宅若分好，我就袂擱想欲倒來。這個所在永遠綴台灣袂著。」
「台灣若徛久，沓沓著變成台灣人，這種事志是誠正常得。你愛倒來、著倒來，毋愛倒來、著莫倒來；聽阮阿嫂的話就著啦，俺娘我會照顧。」槌哥故意說。
「俺娘伊會行會走，會食會做，物事著擱人來照顧？你毋通人情了了。」華章有點不悅。
「歹勢啦阿兄，我實在無想著這點。若是趁俺娘這陣會行會走，帶伊去台灣行行看看得，伊一定會誠歡喜。」