「歹勢啦，可能是我目睭挩窗看毋著。應該是春天的桃花咧開，毋是阮某春桃仔面咧紅。」
槌哥此語一出，更讓春桃笑彎了腰。
「好啦，毋佮妳滾笑啦，我緊擱來去掘。若是像咱這種進度穩會綴著冬。而且我該己嘛咧想，這坵園已經歇誠久無種作，園塗定著會較肥，無管將來是先播芋抑是疊蕃薯，一定會有好收成。」槌哥信心滿滿地說。
「咱若是共彼四坵園還阿兄，伊若是租袂咧出去，又擱無人通種作，我看毋免偌久著會變成草埔；將來若是想欲擱種作，著擱掘草掘甲馬面得。」春桃有點憂慮。
「我嘛是有淡薄煩惱，若是按爾著對不起祖公。」槌哥搖搖頭，內心似乎有些許無奈。
「若是予俺娘知影，毋知欲怎樣共伊解釋。」
「俺娘已經誠久無來山啦，伊應該袂想著赫濟才著。」
「若是有人共伊講咧？」
「上好是毋通予伊知影這項事志，若無，老歲仔一定會氣半死。」槌哥不假思索地說。
「咱應該著共佇這角勢咧作穡的厝邊頭尾交代，毋通共這幾坵園無種作的事志講出去，免得予俺娘聽著受氣。」春桃囑咐著說。
「等咱這冬蕃薯芋收成了後，才揣機會共伊交代。講實的，無按爾做也是袂煞得。這陣我無驚啥物，拄拄驚老歲仔的身體，伊是袂堪的氣得，氣著是規身軀咇咇掣。」
「你講的無毋著，老歲仔若老康健，著是囝兒相大的福氣。」
「我若是想著阿爸破病倒咧眠床頂的時陣，心肝頭著艱苦、鼻仔著酸。想著較早欲飼伊食一喙糜，著共伊偃起偃落，屎尿又擱無法度通該己控制，步步著人來共伊纏綴。破病的人本身艱苦，纏綴的人也無快活，最後天頂彼逝路也是著行，人生著是赫爾無奈。」
「毋通想傷濟啦，過去的事志著予伊過去。」春桃安慰他說。
「講實在得，俺娘若是老康健，我流擱較濟的汗也甘願。」
「你毋免煩惱傷濟，伊這陣有阿秀仔通作伴，心情會較快活。尤其是阿秀仔喙花好，一日到暗俺嬤長、俺嬤短，叫甲予伊喙笑目笑；老歲仔人若是心情好，著會老康健、長歲壽啦！」