「會啦，規鄉里啥人毋知你槌哥是一個有孝囝，聽講較早恁老爸過身時，所用的錢銀攏是你該己一個出得。」
「無啦，阮阿兄伊欲出鼓吹佮師公錢，我講毋免啦。」
「笑死人，鼓吹佮師公錢才幾箍銀？」狗屎木仔不屑地，「恁阿兄台灣徛一個久，我看已經變台灣人啦，對咱厝的人情世事，可能袂記的了了啦。照理來講，爸母過身，無管用偌濟錢，兄弟仔兩個著對開才著。」
槌哥不置可否地笑笑。
「恁春桃一個腹肚赫大個，這胎可能會共你生後生。」
「無管是生後生抑是生查某囝攏好啦，毋通飼大漢無欲顧爸母、註伊溜溜去，若是按爾著無彩工。」
「聽講恁阿兄從來毋捌寄錢倒來予恁老爸老母，若是誠實按爾，實在枉費恁老爸儉酸苦漸，飼伊大漢又擱培養伊讀赫濟書的苦心。」
「徛佇台灣彼個所在，可能所費較重，才會毋捌寄錢倒來。」槌哥婉轉地說。
「做人的囝兒敢會使按爾？」狗屎木仔依舊不認同地，「鄉里人若講著你彼當時，佇共恁老爸偃起偃落，飼伊食糜，共伊拭尻川，纏綴甲好勢溜溜，感動的目屎著強強欲流落來。槌哥，鄉里赫老歲仔攏嘛不時咧講，你會變一個人，是你的孝心感動著天、感動著地，才會予你的頭殼從戇變巧，才會予你講話袂重句，才會予你作穡好收成！俗語話講：人咧做、天咧看；有燒香、著有保庇，一定有伊的道理。」