「當初你是叫我毋通佇你的園種作，是無叫我著共你的園摳草喔。」槌哥故意說：「阿兄，予你講，敢毋是按爾？」
「槌哥，你誠實是大槌，毋是小槌；有你這個槌擱戇的小弟，是我這世人的悲哀，難怪恁嫂仔會看你無通起！」
「阿兄，你知影，我從細漢到大漢攏戇戇擱槌槌啦，槌哥這個名字毋是亂號得。阮嫂仔看我無通起袂要緊，予鄉里人看有通起較重要。」
「你去照照鏡照看覓，槌哥永遠就是槌哥，鄉里人嫌你嫌甲欲臭頭。予你講，陀一個看你有通起？若是看你有通起的彼個人一定是目睭挩窗。你摸摸良心想看覓，從細漢我著赫爾照顧你，但是你攏無帶念著兄弟情，明明知影我徛佇台灣無法度通倒來種作，你嘛三不五時仔共我園內赫草摳摳起來，毋通予赫草發甲半人懸，變成一片草埔。」華章不滿地說。
「阿兄，歹勢啦，我戇戇擱槌槌一時無想著赫濟啦。今仔日既然你已經倒來啦，你該己看欲怎樣摳，著怎樣去摳；愛怎樣摳，就怎樣去摳，無人會阻擋你啦！」槌哥不悅地說。
「槌哥，按爾好啦，聽講這陣園價起誠濟，這四坵攏是狀元園，無管種啥物攏有好收成。我看俗俗賣予你啦，你看怎樣？」華章轉變話題說。
「阿兄，毋驚你笑啦，我分彼幾坵瘦園仔，一年冬種作收的五穀，拄拄有夠飼母、飼某佮飼囝，哪有才調通共你買這四坵狀元園咧。」
「外口人攏嘛講你槌哥賰大錢。」
「風聲的啦，外口人講的話哪會準算得。憑我槌哥這種跤數，若飼母、飼某、飼囝食會飽，已經是阿彌陀佛啦！生食無夠，敢抑擱有通曝干？」槌哥說後，竟替他出主意，「你這四坵狀元園，若是俺娘欲予你賣，你會使去揣赫起厝的頭家，穩當有通賣著好價錢。」
「這園的所有權人是我，俺娘伊憑啥物毋予我賣？老歲仔著是按爾，老番顛一個啦！」華章不滿地說。