「槌哥仔，你又擱佇拚啥物咧？看你一日規頭面汗，拚甲無暝無日，毋通拍歹心命，若是按爾著害了了。」烏番嬸關心地說。
「俺娘，我這段時間佇掘園邊啦，若無草會沓沓伸入來園內，到時若是十股變八股，會予人相紲笑、欲笑笑無份。」槌哥說。
「恁老爸較早佇作穡的時陣著是像你按爾，無管是抾園頭、掘園邊，攏是斟斟酌酌。作穡人著成一個作穡人樣，袂使貧憚得。」
「俺娘，等我一坵一坵重新整理好勢，我才擱用手?朱車，共妳推來去山行行看看得，予妳看看恁囝有成一個作穡人無？」
「我有佇想啦，」烏番嬸興奮地，卻也嚴肅地說：「講實在得，咱山赫田園，無管是狀元園抑是瘦園仔，攏是咱祖公一鋤頭、一畚箕，流血、流汗沓沓開墾出來得。也著是按爾，這田園佮咱有誠深的感情成分，若無田園通種作，人著無法度通活。咱毋爾著疼惜這塊土地，而且嘛袂使共伊荒廢掉。恁阿兄受著彼個北仔查某的灌水，竟然數想欲共彼四坵狀元園賣予人，用賣祖公園的錢欲去台灣買厝、買車，咱兜出出這種不孝的囝孫，實在予我誠凊心。好加在有你共春桃佇我身軀邊，有彼對孫咧參我作伴；若欲靠恁阿兄佮彼個北仔查某，我看，已經枵死無人知啦！」
「俺娘，阮阿兄彼四坵園伊毋敢賣啦，赫園永遠是咱兜的，有我槌哥佮春桃，咱兜所有的田園厝宅，阮一定會好好來看顧，絕對袂共伊荒廢去。無管這陣的土地起價起偌濟，無管賣園賣地會予咱變好額人，但是佇我頭殼內，祖公留落來的田園厝宅，一塊磚、一塊瓦，一粒沙、一把塗，攏總袂使賣得！阮阿兄可能佇台灣徛久啦，對咱這塊土地已經沓沓無感情，按算將來毋倒來徛啦，才會想著欲共伊分的田園賣掉。」槌哥激動地說。