「人佇變無地看啦！」烏番嬸搖搖頭感歎地說：「恁阿兄細漢的時陣毋爾乖、擱聽話，讀中學的時陣嘛誠捌想，禮拜日攏嘛會去山共恁爸湊作穡，倒來厝擱會共我湊擔水、湊飼豬。我不時嘛咧共恁爸講，這個囡仔大漢會有出脫、會倚靠得。想袂到序大人儉酸苦漸予
去台灣讀大學，畢業娶某了後煞變另外一個人，予我誠凊心。」
「俺娘，妳毋免煩惱赫濟，阮阿兄 可能是受著台灣彼個社會的影響，才會變赫現實。妳這陣徛佇咱祖公留落來的古厝，有囝新婦通照顧妳，有兩個戇孫通陪伴妳，有通食、有通用，好好保重該己的身體較重要，賰的莫想傷濟啦！」槌哥安慰她說。
「想著你細漢的時陣，有一日無物無事煞發燒，頭額燒甲會燙人，可能是燒過頭，大漢的時陣頭殼煞戇戇，予序大人煩惱甲強欲死。想袂到你這個戇囝，竟然會飼爸，竟然會曉照顧一個倒佇眠床頂的破病人。槌哥，俗語話講：人咧做、天咧看，一點攏無毋著。你的孝心毋爾感動著天、也感動著地，才會予你的頭殼沓沓好起來；龕內的祖公祖嬤也有佇保庇，才會予你佮春桃這個賢慧的家內湊陣做、湊陣食。恁這家口，毋爾予我誠感心、誠安慰，外口人若講起恁翁仔某，無一個無呵咾得！」