──「俺娘，妳會記的袂？這坵叫做戰壕溝，咱捌種大麥，抑捌種玉米。」
──「俺娘，妳會記的袂？這坵叫做面前山，咱捌種符豆，抑種番仔豆。」
──「俺娘，妳應該會記得，這坵叫做菜園，園頭有一個古井，泉水誠飽，規年通天毋捌焦過。咱種過白菜頭、紅菜頭、菜球、高麗菜、網甲蔥、山東白、包頭蓮、菜豆、符乳豆、烏鬼仔豆；嘛捌種過刺瓜、苦瓜、金瓜、角瓜佮臭柿仔；擱有芹菜、韭菜、蒜仔佮蔥……。除了咱該己食外，有時妳嘛會提去分厝邊頭尾煮。俺娘，妳會記的袂？」
「戇囝，我頭殼抑擱精神乎乎，你講的這我攏嘛會記得。想著彼陣，共恁兄弟仔放囥園頭，予恁該己佚佗，我佮恁老爸攏著落園去種作。想袂到一晃過三冬，三晃一世人，恁兄弟已經大漢啦，我佇這個世間也無偌久通活啦。今仔日會當佮囝新婦參兩個戇孫仔來咱山行行看看得，毋爾予我心情好，嘛予我想著較早佮恁老爸佇作穡的事志。這陣若是予我目睭閉落去，我毋爾袂怨歎，擱會微微仔笑啦！」烏番嬸內心似乎有無限的感傷。
「俺娘，等有一日阮阿兄佮阿嫂若倒來，咱規家才擱來咱山行行看看得，彼陣妳的心情一定會擱較好。」春桃說。
「對台灣彼家口我已經凊心啦，講傷濟是咧加予我氣身惱命得。春桃仔，別日我若是死去，這個家著看妳啦！但是嘛毋通袂記得，除了咱這爿的祖公祖嬤著顧外，阿生彼爿的祖公祖嬤也著照起工，年節著共拜較鬧熱得，金銀紙著加抾一屑落去燒，按爾才對伊會咧過。」烏番嬸語重心長地囑咐著。
「俺娘，這妳毋免煩惱，我會雙爿顧啦！」春桃安慰她說。
「春桃仔，抑擱有一項事志我袂使無講得，阿生彼爿的田園厝宅，這陣攏咱佇徛、咱佇種作，將來恁赫囝看啥物人去成彼爿，無管是園契抑是厝契，一定著過伊的名。傢伙各人各人好，囝孫自有囝孫福，毋通含含糊糊變成囝孫厄，按爾著無好。」烏番嬸再一次地叮嚀著。
「俺娘，我會記得妳的話，希望我腹肚內這胎原在是一個查甫囡仔。雖然妳這陣提醒我赫爾濟事志，予我感激咧心肝內；毋拄俺娘，我看妳這陣佇講話的心情誠沉重，妳還是毋通想想赫濟，該己著保重啦！」春桃又一次地安慰她說。