任何一隻鳥仔按目睭前飛起來，攏是一首美麗的詩。這首詩記錄著溼地的歲月，也記錄著惦在這個所在生活的人，伊心內的故事。
每一擺經過竹南保安林濕地時，這款的感受趁深，看到愈來愈少的鳥仔佮紅樹林，心頭有淡薄啊煩惱，毋知影這片溼地是不是會因為一寡人的無知來消失？
無偌久以前，報紙甲電視攏有治報，大甲溪出海口南爿，一千五百公頃的高美濕地，遭受一陣人的迫害，心頭一陣青驚。
　有一間翕相館搬鋼琴到高美溼地為新娘翕相，予人翕相檢舉，台中縣政府依違反「野生動物保育法」，對攝影師罰5萬到25萬元。 　一位被退學的資訊傳播系學生到高美濕地製作短片時，將小貨車開進濕地，還將鷹架設在雲林莞草頂頭，破壞生態。
高美濕地予人偷倒廢棄的油，保護區受到污染的面積超過三平方公里，大約是四百外個跤球場大小，造成嚴重生態浩劫。
想起無偌久以前的代誌，心頭猶原糟糟。
高美濕地惦在清水鎮西北爿，古早時叫做高密，根據彰化縣志的記載：因為這個所在的海面，會當將撐船的竹竿歸支吞落去，而且台語的發音，「高」佮「竹竿」的竿發音相仝；密，閣有「沕」的意思，所以，又叫做高密。
溼地的 ，時時刻刻攏無仝，日時的海風吹著歸大片的雲林莞草，遠遠看去，親像海泳般起起落落，搖蕩如千頃波濤；欲暗仔，夕陽照著海面，浮出一片金黃的色彩，景色非常美麗。
雲林莞草，是一種多年生的植物，莖三角形，適合在河佮海交會的地帶，或沿岸沖積濕地生長，一直是毛蟹、石貼仔（彈塗魚）真好的庇護場所，也四常吸引趁濟鳥仔來這討食。這歸年來，因為地球的暖化，分布在西部海岸佮蘭陽溪出海口的雲林莞草也慢慢消失。
秋天，木麻開始落葉，雲林莞草也漸漸徛黃，一批一批按足遠來的鳥仔猶原來到這個所在，無論短暫的過境或是過冬，總是為這這所在帶來鬧熱的氣氛。
根據手中這本賞鳥圖鑑記載，四常治濕地活動的鳥仔有五大類，鷸科、鵰科、鷺科、雁鴨科，每年冬天會按北爿飛來這避寒，到了大地回暖的春天，再度起程轉去故鄉。
莫非伊已經習慣這種生活方式？
經過竹南以後，將車窗搖落來，沿著西濱公路一路往南慢慢前進時，鹹佮澀的海風未曾歇睏，陣陣向車窗吹來，滯留面上的鹹澀沙粒，讓阮可以感受到台灣海峽的心跳。
阮按台六線省道轉入港墘，往保安林溼地的方向行。
惦在離濕地有一段路防風林裡，透過千里鏡，阮看到了潮溪、草澤、沙灘、泥地等棲地，趁濟叫不出名的鳥仔惦這盹龜，也有順著阮的目睭邊快樂飛行，非常鬧熱，電視節目中出現的大自然畫面，敢偌搬電影，一直出現阮的眼前。
保安林濕地惦治中港溪出海口北爿，是一個人工栽種的水筆仔林，因為中港溪帶來趁多的有機物，加上水流的速度趁慢，淡水甲鹹水交抵，漸漸囤積大量的營養土壤，提供水筆仔趁好的生長條件；這個所在也孕育了趁多的彈塗魚、毛蟹，也提供了鳥仔良好的覓食環境。
濕地是一個趁特殊的所在，治這有趁多紫斑蝶細尾蟲仔愛吃的羊角藤，每年三月尾到四月初，趁多紫斑蝶往北方飛，因為按呢，也漸漸變成紫斑蝶傳宗接代的所在，環保人士將這個所在叫做「生態型蝴蝶谷」。
紫斑蝶按南台灣避冬歸來，飛了上百公里遠，惦治羊角藤頂面的後一代，親像吊掛的聖誕燈，隨著風搖來搖去，非常的浪漫。
無偌遠的所在，夕陽按溼地反射出來的波光，有淡薄啊黃金的色彩，有一群叫袂出名字的鳥仔，恬恬徛著，親像真疲勞的流浪漢，擔心著還未有下落的暗頓。按一隻毛蟹驚惶的逃難過程中，阮看到日頭落山以後必須面對的黑暗。
溼地有趁濟的污染，欠缺一點仔人類的關懷。
自從人類的文明初始以來，就一直惦在海岸地帶生活。
海陸交會的所在，提供了平坦舒適的生活環境、豐富的生物資源佮便利的水陸交通。科技發達的今仔日，全世界閣有百分之五十的人，住在離海邊五十公里內的海岸地區；人口密度是內陸地區十倍以上，所以，人類對海岸環境的衝擊也是尚大的。
台灣四面環海，海岸線長達一千六百公里。
荷蘭人佔據台灣時，曾經以台灣做為輸出、補給的轉運站，台灣也因此第一次徛在世界的舞臺，以鹿皮、蔗糖、茶米揚名國際。
西海岸濕地一直面臨開發的壓力。
平地面積無到全島三分之一的台灣，祖先為著彌補徛家佮耕地的不足，過度使用了這片土地，大量剉樹仔，山坡地也治怪手的怒吼聲中移為平地，變成徛家佮農地。
無偌久以前，按海邊的沙埔行過，看見沙埔頂趁濟破碎的玻璃甲塑膠袋，阮只好慢慢行過沙埔，趁驚無堵好踏到玻璃。行過沙埔時，阮開始擔心四界飛的塑膠袋仔，對海洋生命已經造成了危機。曾經看過一篇報導，被遊客放揀的塑膠袋仔，海洋要趁長的時間來消化，香蕉皮二年以上，塑膠袋仔十年到二十年，尼龍三十至四十年，皮鞋甲鐵罐仔五十年以上，阿鋁覓地罐仔八十至一百年，若是玻璃干仔必須經過一百萬年，才有可能被自然分解。
被放揀的漁網治海泳中浮游，惦在海洋中生活的海龜將塑膠袋當作活水母，吃入肚子以後，災難就慢慢治伊的身軀發生，無人知影海龜會勘得活偌久？
飛過海面的海鳥，將趁細的塑膠碎片當做魚蛋，當作細尾的魚仔，吞落腹肚，有外濟人關心伊的生活？根據統計，每年有超過一百萬隻鳥仔甲十萬隻海洋動物，因為無知而吃塑膠袋仔而死亡。
行過沙埔，想到這呢濟的代誌，心情有淡薄啊沉重。
跟隨阮來的囡仔希望在溼地找到歸條杜蚓仔，遺憾的是，阮翻過了趁濟所在，攏無發現。農地大量使用肥料以後，改變了土壤酸鹼值，農藥的濫用也毒害了蚯蚓的生存。
囡仔問：杜蚓仔是不是也會變成瀕臨絕種的動物？
阮煞來無法度回答這個問題。
有啥人知影，偌濟種類的杜蚓仔因為對環境改變的不適應而消失？莫非這就是人類與生態環境在生存競爭戰場上輸贏的結局？
無知影自己的無知或無心的行為，已經毀滅了遐的生物，這是人類的悲哀。
離開保安林溼地繼續沿著濱海公路往南方前進，海風吹進車窗，帶來了淡薄啊屬於海洋以外的臭味，那種味道來自溼地鳥仔的屍體。
心頭糟糟。
走過保安林溼地，想起了台灣。
清朝將台灣割給日本時，對台灣「鳥不語，花不香」的粗淺認識，漸漸自腦海中浮現，也使人驚惶，親像台灣咧欲在功利主義作弄之下，變成一座無自然生態的荒島？
雖然有人講：予伊去啦！莫插伊？
對這句話，我存著懷疑，也開始擔心！
沿著海岸產業道路行，來到大肚溪口南岸。
這搭會當可見農民治河床種農作物，每天無閒的農民是不是會記得以前大肚溪的清澈佮美麗？走過寬闊的沙埔，一望無際，親像行過敦煌那片沙漠，有一寡心寒！
惦在大肚溪口南岸的人，為著生活，四常捉「蝦猴」到市場賣，換一寡現金過日子。蝦猴是沿海地區真特殊的海產，特別是在每年秋、冬交替的季節，母蝦猴也佮蝦子、毛蟹相仝，身軀有趁濟「蟹黃」，所以，趁濟人以捉蝦猴為業。
捉蝦猴不是簡單的代誌。
漁民用鐵牛車載著一台一台的抽水馬達，馬達接一條長長的水管，水管的尾啊閣接著一段硬的塑膠管。捉蝦猴時，將硬塑膠管插入泥沙中，用抽水馬達灌入趁強的水，使得覕在洞穴內的蝦猴，感覺搪著「土石流」，一隻一隻沖出來。
一直對鳥仔的生態沒啥興趣的囡仔，這個時陣，歡喜的捲起褲腳，治趁濟蝦猴洞的沙地，趁認真用塑膠鏟仔挖土，然後將挖出來的土堆在一起，無偌久，被圍起來的所在開始有水洩出來。囡仔露出驚喜的表情，一爿挖沙一爿用腳踏著沙地，治水有淡薄啊濁的時陣，覕在沙地的蝦猴受不了濁水的干擾，一隻一隻爬出水面………
一位捉蝦猴趁濟年的老人講，蝦猴用鰓呼吸，海水被弄腌臢，呼吸袂順，就會爬出來，找清氣的海水。
老人的話親像沉重的鉛球，一句一字撞擊耳孔，心情沉重。蝦猴被迫遠離混濁的生活環境而成為人類盤中的美食時，有偌濟人想過，鳥仔佮人類被迫遠離大肚溪，會是怎樣的情景？
老人微微笑，露出銀色的嘴齒，面上浮出淺淺的無奈，繼續用馬達抽出的水灌蝦猴，在灌蝦猴時，許趁濟生活在沙地中的生物被沖出來。治附近踅的海鳥飛向這爿來，發現被水灌出來的生物，以趁緊的速度，親像箭一般衝落來，叼起趁幼趁幼的生物，又閣迅速飛向天！
溼地有趁濟的污染，卻欠缺一點仔人類的關懷。
莫非伊已經習慣這種生活方式？啥人會當回答這個問題？
離開時，日頭漸漸落海，風愈來愈透，趁遠的所在，風車猶原趁無閒治遹。想起老人捉蝦猴的情景，想起鳥仔盹龜佮討食的模樣，心糟糟，親像刀治剺！