有一日下班倒去厝，看著塗跤有一寡仔塗，隔日看機車面頂嘛是有塗，閣黏黏的款，心內煞感覺誠奇怪。紲落來幾日攏是按呢，我攑頭看面頂是不是有啥物？結果有一點仔鳥鳥的物件。
逐日透早烏燕仔就一直佇外口出聲，毋知咧講啥物貨？閣佇社區來飛來飛去、飛懸飛低，有時仔休佇阮厝的頭前，加上不時有塗出現，我知影烏燕仔來阮第作岫啊！要共伊趕走抑是毋通？有時開大門烏燕仔會飛走，我想我離開了後伊閣再停起去，煞煞去仔，乾脆隨在伊。
過幾禮拜了後，有一日看著烏燕仔停佇面頂，原來是岫作好啊！真是不簡單，另外一位所在若像進前袂做好的時，我想烏燕仔閣想欲做另外一個岫啊，烏燕仔到底是去啥物所在揣作岫的材料？我想閣無偌久塗跤著會沓沓有烏仔屎啊！到時真正就愛「傷腦筋」啊！