阿媽講伊想欲擱去爬大山
那年跋倒了后就毋捌提起
今日透早雄雄反講欲去
阿媽講伊誠久嘸去大山拜拜了
阿爸講
阿母，汝跤袂行，我再去拜就好
阿媽還是反袂煞
落尾轉講氣話，也是真話
阿就恁老爸有託夢予我
講伊佇大山遐在等我
講遐誠寒啦
阿爸煞流目屎
九歲阿公過身了后
就是做祭，掛墓紙
也毋捌看伊遮傷心

阿爸拭拭目屎，佮阿媽講
好啦，阿母
找一日咱再來去
大山
阿媽頕頭文文仔笑
文文仔笑，好親像
在想什麼代誌

嘻嘻，我知影
伊已經看到大山，也
看到阿公矣

註：金門最高的太武山，老一輩的鄉親習慣稱大山。（稿費請轉捐金門家扶中心）