八二三的機關銃佮砲彈
已寬寬仔成做
看顧金門的燈火光

彼是因為有一群兵仔兄
奉獻家己的胸坎
家己的肩胛，家己的目睭，
家己的跤頭趺
袂輸若一隻閣一隻
飛佇暝暗的火金蛄

若有鋼刀般的眼神
揹起圍佇三鎮三鄉的海浪
無怨嘆袂怨慼
恬恬靜靜，用自己的力頭
生湠出這座海濱浯島
未來有日頭花的所在

艱苦的目屎是會來停止
毋過歷史的傷跡袂使袂記得
因為彼攏是
這片金門上蓋要緊的，
閃閃爍爍兵仔星

　　註解：銃：槍。目睭：眼睛。寬寬仔:慢慢。火金蛄：螢火蟲。目屎：眼淚。上蓋：最。