車過陽宅埔

遠遠著看見碧山路

正面是溪仔墘

左邊是要去山後的路途

經過象叔仔的雙落厝

走過德幸叔公的番仔樓

睿友學校是阮細漢讀書的好場所

徐先生 對待學生像子弟

人人講伊教學認真 閣嚴格

誰若是呣聽話 籐條舉佇手

罵阮「死囝仔 細漢呣讀冊 大漢著放牛」

幾十年來這句話

攏嘛深深放佇阮的心肝內



村內的這條路

東有東祖厝 西有前廳祖

一片一片的石頭壁

一間一間的古早厝



鄉親善良閣忠厚

無怨無嘆來打拚

田內種的安薯芋

阿爸輾的安脯糊

共阮飼大漢

乎阮呣免飫腹肚



白沙崙 紅墩頂

番花跤 牛車路

有阮細漢 的腳步

樹林內的杜麗吱吱叫

露稅田的蟬仔會唱歌

網加追 抓加令

掘土蚓 灌塗猴

嘛捉蟋蟀來相咬

想起彼時陣

親像昨暝佇眠夢



昭靈宮 田府元帥香火真興旺

潁川堂 陳氏列祖列宗來保庇

男丁一個一個真爭氣

教書先生十外人 公家頭路嘛真最

中央官員有昆仁 金酒副總名榮華

博士學者叫建民 訓導主任是順德

檢調單位有建興 花崗課長是添壽

憲兵科長陳長春 警衛少校陳世強

海巡官員叫陳謙 中正理工陳弘驥

嫁出去的查某囝

一個一個賢慧無塊比

乎阮碧山無落氣 無落氣



倚佇後山頭 看著許白礁

田浦港仔 大地溪

攏嘛佇阮目睭內

樹尾綠綠 草青青

海水藍藍 沙白白

潭內有魚蝦 垵口邊仔有水路

對面著是阮的原鄉叫深滬

對面著是阮的原鄉叫深滬

二○○二年十二月寫於金門碧山