我是一个快樂的本土語老師，我真佮意我的工課，雖然現此時大部分的囡仔，對家己的母語攏感覺足生份，毋過逐禮拜佇學校的這節課，若是會當予有興趣，我相信對這个語言的復興是有幫贊的。
頂禮拜上二年仔的課，講著「蟲豸」，課文內底有一段是：春天的早起時，「蝶仔」飛來飛去。有的小朋友竟然唸做：春天的早起時，「鞋仔」飛來飛去，老師我佇台仔頂笑甲強欲反過去，囡仔煞感覺霧嗄嗄。經過我的解釋了後，全班的小朋友嘛綴咧笑甲東倒西歪。
閣有一擺全班咧練習句型：我上愛食啥物？囡仔講出來的答案百百款，有的是果子、有的是四秀仔，嘛有的人講正頓，這个時陣，班上的阿瑋回答：「我上愛食thang-á罝。」我問伊：「你敢知影thang-á罝是啥物？」伊應講：「是糖果。」我共伊講：「th?罡ng-?罝是蟲仔喔！」我順紲利用這个機會教伊分辨「蟲仔」、「糖仔」佮「窗仔」的無仝，嘛予伊知影，語言著愛學予斟酌，若無就會一丈差九尺，笑破人的大喙。
細漢的時，佇厝裡老爸老母攏佮阮講閩南語，所以來學校毋免人教，阮就足𠢕講矣，毋過這馬的囡仔，連爸母就袂啥會曉講母語矣，就算會曉的，嘛袂教家己的序細講，致使母語的流失速度變甲真緊，已經出現斷層矣，好佳哉猶閣有袂少人咧為這个語言恬恬仔付出。我會當佇學校教閩南語，我感覺真驕傲，雖然囡仔定定「鴨仔聽雷」，毋過我會繼續骨力為本土語言拍拚，想盡辦法予伊了解語言佮文化的關係，予伊對這个語言閣較有興趣，有一句話講：「毛毛仔雨沃久，塗跤嘛是會澹。」若是你會曉講閩南語，請你大聲講出來，因為這是爸母留予咱上珍貴的資產。