「好佳哉有汝陪伊去看醫生、共伊提藥，擱共我湊犁田、擔粗、擔糞，所有粗重的工事，攏是汝來湊跤手，才袂予彼田園荒廢成草埔。福生兄，汝會使講是阮兜的大恩人，我毋知欲怎樣感謝汝才好！」秋霜激動地說。
「身為元富的朋友，佇能力範圍內，共汝湊相共也是應該的。敢會使親像彼無同理心的人，閃甲遠遠的。若是按呢，敢對得起家己的良心。」福生哥誠摯地說。
「聽講汝經常共阮湊跤手，玉卿嫂有淡薄仔無歡喜，是毋？」秋霜試探著問。
「伊的個性汝知影，也有一點仔怪僻。佇我的想法，朋友有困難的時陣，我袂使因為伊的無歡喜，就毋共朋友湊相共，按呢實在講袂咧去。」福生哥不在乎地說。
「毋通因為共我湊相共，造成恁翁仔某的無爽快，按呢就歹勢。」秋霜愧疚地說。
「袂啦，汝放心好了。以後已經無機會通陪元富去醫院看醫生，也無機會通去共伊提藥。若是起冬落冬，抑是粗重的穡頭，只要汝交代一聲，我一定會利用時間共汝湊跤手。絕對袂因為元富的往生，予咱的友情隨著伊埋囥塗跤底。朋友之間互相幫忙也是人之常情啊！毋拄有一件代誌我著先共汝講清楚，俗語話講：『寡婦門前是非多』，所以我袂使像元富在世時，經常來恁兜行踏，免得予鄉里彼八卦婆講閒仔話。」福生哥說。
「喙生佇別人的身上，因愛怎樣講就隨（亻因）的便，只要咱光明磊落、問心無愧，有啥物好驚的。」秋霜不在乎地說。
　　「話雖無毋著，但是人言可畏啊！若是對汝造成傷害，毋偌對不起汝，也對不起九泉下的元富。」福生哥有所顧慮地說。
「福生兄，我知影汝的意思，汝想了誠週到，像汝這種有智慧的人毋是真濟啦。」秋霜由衷地說。
「抑擱有一項代誌，我嘛著共汝提醒……。」福生哥欲言又止。
「啥物代誌汝註汝講。」
「汝長久佇元富身軀邊，是不是會受到伊肺癆的傳染、家己毋知影。我建議汝揣一個時間去醫院檢查看覓，毋通袂記汝抑擱有兩個囡仔需要汝來照顧。萬一汝予傳染著，再擱傳予恁囝，彼陣就毋是滾笑矣。」福生哥提醒她說。
「可能袂彼呢嚴重吧，我這陣毋是好好的，雖然有時會嗽，拄了一聲半聲爾爾。」秋霜說。
「汝可能家己無注意著，我經常聽到汝咧咳咳嗽，嗽佮肺有真大的關係。尤其是肺病初期，看袂出有啥物明顯的症頭，若是發現得早，食藥就會好。若是拖延落去予伊惡化，就誠歹醫治。所以我建議汝著揣一個時間，去醫院檢查檢查，以防萬一。」
「福生兄，感謝汝的提醒。講實在的，對於醫學常識，我是全然毋知影。從鄉里人知影元富得到肺癆病，閃甲遠遠的來看，就知影伊的嚴重性。但是身為元富的家內，若是無照顧伊，又擱欲寄望啥人來照顧？若是不幸予傳染著，也著認命。」秋霜無奈地說。（七）