「毋通黑白講，福生伯仔伊是共咱湊相共，毋是像恁講的彼款人啦！」秋霜辯解著說。
「福生伯仔無彼好心，欲替咱出戇力、做白工，一定有伊的企圖心。」志清說。
「 阿兄講的無毋著，若是修理費四十五萬，伊可能抽四萬五，一成走袂去。」志勇說。
「恁兄弟仔毋通講講彼五四三的，講話著憑良心，做人著知影通感恩。恁細漢的時陣受到伊的照顧真濟，敢講恁已經袂記得啦？若毋是伊共咱湊擔粗、湊擔糞，敢有五穀通收成；若毋是伊共咱湊犁園、湊種作，彼園老早就變成草埔啦。」秋霜不滿地說。
「共咱湊做彼點仔工事，人情較大天，講出來敢袂予人笑。阿母汝問伊看覓，看著予伊偌最工錢，我明仔日就付予伊，按呢就毋免欠伊的人情。」志清神氣地說。
「人情是相寄，人情是記囥咱的心肝內，毋是金錢買會著的；恩情是用報答的，毋是用喙凊彩講講的，敢講這點仔道理恁也毋捌？」秋霜激動地說。
「好啦，毋免擱講講遐啦，咱欲請人客的代誌，汝敢有咧安排？」志清說。（三五）