志清沒有理會她，問志勇說：「汝敢有看著福生伯仔？」
「這隻老豬哥，伊毋敢來啦！」志勇說。
「無來上好，若無鄉里人一定會擱講伊佮阿母的代誌。咱誠衰潲，好好的面子，予（亻因）兩個老伙仔共咱削了了！」志清說。
「從今以後，咱莫擱倒來這個予咱凊心的所在，踮台灣好好做咱的無本生意。若是繼續按呢落去，毋免擱三年五年就會使共規棟大樓買起來，到時欲娶電影明星抑是歌星，毋免驚無。」志勇神氣地說。
「毋拄抑擱有阿母，伊是咱上大的精神負擔，咱若是無倒來，是毋是會予人講咱不孝。」志清有所顧慮地說。
「莫管伊彼濟啦！反正咱已經寄錢共古厝修理好勢，徛的所在伊毋免煩惱；伊種的五穀一定有夠伊家己一人食，所以食的咱嘛毋免替伊擔心；平常時有福生伯仔咧共伊照顧，伊精神上一定會真快活；賣豬的錢嘛有夠伊一年冬的所費，後次咱也毋免擱寄錢倒來予伊。總講一句，伊過伊的生活，咱過咱的生活。」志勇狠心地說。
「按呢可能會予鄉里人講話。」志清擔憂地說。
「驚啥物，咱跤若離開這塊土地，就聽袂著、看袂著！嘛無想欲擱倒來。阿兄，汝敢無看著，咱好心好意叫菜館欲請人食，鄉里彼濟人拄拄來一半，佮番客佇請人客袂比得，實在看咱誠衰潲。既然鄉里人彼呢無情，後次咱就是佮這個鄉里，切予清氣清氣，啥也無欠啥！」志勇激動地說。
「我敢接呢講，番客是好名好聲爾爾，大部分攏是佇番爿咧做苦力，替人搬貨舉包頭，好名好聲的大頭家，比咱較不如的規四界。佇台灣的股票市場，啥物人毋知咱兄弟仔的名聲，有一屑仔欲倒欲倒的公司，（亻因）的股票經過咱的操作，一翻就是幾落倍；投資人趁一百，咱趁一千，敢抑擱有啥物比這較好趁的。但是無水準的莊跤人，聽著番客倒來，就趕緊來共伊捧膦脬，共伊當做神來拜。咱這次好心好意叫菜館欲請（亻因），竟然拄拄來一半，實在予咱誠無面子。」志清激憤地說。（四○）