這幾日聽著電視新聞咧講：「足濟人四界買無雞卵」的消息，本來我無足關心這個話題，毋閣年兜到矣！二九下昏過後彼幾日有可能外口的店無開，阮愛食家己，翁仔叫我去買「卵餅皮」佮「雞卵」來囥冰箱內，到時才袂枵腹肚。
無想著連金門嘛揣無雞卵，大賣場行足濟逝攏揣無，去農會嘛看無，問店員，伊講：「中晝可能有，愛看有卵無。」我行路去漁會看覓，結果看著「白卵」，賰無偌濟，先買才講，若無到時無雞卵通摻，著毋是「卵餅」矣！
「雞卵」為啥物會減少？為啥物足濟所在攏空空？有錢無塊買，有啦！我看水果店內猶有，雞卵，平常時逐家攏愛食，這陣煞變做愛去揣才有，咱愛好好好珍惜矣！