於是她開門見山就直接對狗屎嬸仔和春嬌說：「恁母仔囝毋通按呢對人，自從塗猴來予恁招了後，伊上山落海搰力咧拍拚，鄉里人攏嘛看佇目睭內。恁毋通無物無代大聲細聲，擱起跤動手舉掃帚共伊拍。袂使按呢對人啦！」
「來福嬸仔，一家一家代，汝毋知啦！這隻夭壽塗猴敢死擱無認份，無想伊是來予阮招的，竟然我講一句伊應百外句，汝講有敢死無？若無共伊教示，後次會予伊騎囥頭殼頂放尿啦！」狗屎嬸仔不屑地說。
「咱兩家拄拄隔一逝巷仔溝，後門仔又擱相向，恁講的每一句話，我攏聽甲清清楚楚。我毋是佇偏袒塗猴，恁母仔囝有時實在傷過份，伊透早起來抑未食糜，就先擔豬尿去山潑，然後擔兩粗桶安茨倒來，食食早起糜又擱趕緊欲去山種作，做甲日過晝才倒來食中晝，這款查甫囝是欲去佗位揣呢？咱攏是作穡人，上山種作攏著出氣勞力，三頓食的攏是安茨糜，無油無腥，腹肚定著會緊枵。但是我親目看著，也親耳聽著，有一日佇食中晝的時陣，伊欲加添一塊安茨箍來食，汝竟然罵伊枵鬼，講家伙會去予食倒去；春嬌也共伊的碗筷搶落來，叫伊啉安茨湯就好，袂使擱添安茨箍去食。恁山頂的穡頭欲叫伊做，糜無通予人食飽，恁這款做法敢著？」來福嬸婆不客氣地數落她說。
「來福嬸仔，汝毋知啦，這隻塗猴偌枵鬼汝敢知，一頓尚少著食五六碗糜才會飽。而且湯毋啉，專揀安茨箍去食；豆豉毋配，一菜盆塗豆食了了。予汝講，我有幾個家伙通予伊按呢食咧？」狗屎嬸仔理直氣壯地說。（一六）