「自從塗猴來予恁招了後，恁一年冬的五穀毋知加收成偌最，恁敢有認真算過？若無伊搰力佇種作，靠恁狗屎也一個人，安茨敢有通收幾落十擔？塗豆敢有通收幾落布袋？若無予人食飽，敢有氣力通上山去種作？恁母仔囝著摸摸良心看覓，毋通對人彼呢刻薄啦！」來福嬸婆毫不客氣地說。
「來福嬸仔，一家一家代，汝老歲仔食予飽、穿予燒較要緊，賰的毋免汝來管。塗猴來予阮春嬌招，等於來予阮做囝，老母教囝是天經地義的代誌，我勸汝顧好汝家己，阮第的代誌毋免汝管！嘛毋免汝來做家婆！」狗屎嬸仔不屑地說。
「汝目睭共我展予金，我這個嬸婆毋是做假的，勸恁母仔囝毋通軟土深掘，若無逐家才來試看覓！」來福嬸婆警告她說。
「試看覓就試看覓，啥驚啥咧！」春嬌不屑地說。
「汝這個死查某鬼仔，著共我較差不多的，毋通袂記的塗猴是恁翁！汝今仔日毋爾無欲圍伊，擱聯合恁老母來欺負伊，汝按呢敢著？敢有天良？毋通袂記的汝已經大腹肚啦，腹肚內的囡仔敢毋是塗猴的種！」來福嬸婆提醒她說。
「我這世人衰三代，腹肚內才有這隻夭壽塗猴的種，若是生一個像伊馬臉、蒜頭鼻、暴牙又擱喙臭的囝，到時我一定欲共伊掐死！」春嬌狠心地說。（一七）