「汝這個死查某鬼仔，心肝哪會彼雄，哪會彼呢惡毒，講講這款僥倖失德的話，敢對得起汝的良心，敢毋驚去予雷公敲死！汝腹肚內的囡仔，敢講毋是塗猴的種，敢講毋是汝的骨肉，敢講是汝去討契兄佮人大腹肚的！」來福嬸婆怒指著她說。
「我敢按呢講，若是去討契兄，生出來的囝一定袂馬臉、蒜頭鼻、暴牙又擱喙臭，生出來的囝一定會比彼隻塗猴較才情！」春嬌神氣地說。
「人著知影通見笑，毋通講講遐見笑話。若毋是塗猴來予汝招，像汝這種歲聲佮德性，有啥物人欲挃咧？可能著佇恁第做老姑婆。」來福嬸婆挖苦她說。
　　狗屎嬸仔一聽，氣急敗壞地說：「做老姑婆是阮第的代誌，佮汝啥物治代？我是看汝歲聲彼呢最，無想欲佮汝計較，毋通認為我是佇驚汝。後次阮第的代誌毋免汝來管，若想欲替塗猴出氣，汝踮遐沓沓仔等，看欲怎樣隨汝的便，我無咧信汝老歲仔彼套啦！汝若毋相信，咱逐家試看覓汝就知影！」
「汝遐敢死，鄉里人拄拄汝這個刺查某敢佮我應喙應舌，無大無細擱無倫理！汝毋通講塗猴驚汝，嘛毋通認為鄉里大細逐個攏驚汝，恁母仔囝所作所為，老早就引起鄉里人的不滿。若是繼續對塗猴彼呢刻薄，有一日會予恁母仔囝歹看！」來福嬸婆警告她們說。（一八）