「我騙汝欲死！汝欲信就信，毋信就煞！老歲仔講話著存天良，毋通汝講汝著，別人講的攏是廢話。塗猴一個彼呢大箍，力頭也誠飽，大力共我壓條條，我敢滾會開？連這呢簡單的道理汝也想袂出來！人講老番顛、老番顛，我看汝是愈老愈番顛！愈老愈糊塗！」春嬌憤怒地說。
「汝這個猴死囡仔，無大無細！恁第是無大人通教示是毋？」來福嬸婆怒斥她說。
狗屎嬸仔見狀，怒氣沖沖地指著她說：「來福嬸仔，汝毋通欺負人，明明無汝的代誌，汝偏偏食飽傷閒，欲替塗猴來出氣。我請問汝，塗猴佮汝啥物關係？是恁啥物人？汝物代著出氣勞力來替伊講話？汝講啊、汝講啊，予汝講啊！」
「汝這種是啥物口氣、啥物態度，我無大汝年也大汝月；論輩份，汝著叫我嬸仔，恁春嬌著叫我嬸婆，敢連這種基本的倫理恁也毋捌，若是按呢就毋免佇這個鄉里佮人徛起。恁母仔囝摸摸家己的良心，看看恁是以啥物心態佇對待塗猴，毋通軟塗深掘看伊無通起，有一日恁這家口攏著靠伊食穿，毋信恁試看覓！」來福嬸婆高聲地說。（二○）