「啥物人靠啥物人食穿，抑擱無定著。田園是阮的、家伙是阮的，塗猴是來予阮做囝的，是來予阮春嬌招的。伊若狡怪，恁爸就共伊趕趕出去，予伊出去外口吹風曝日枵枵死！」狗屎嬸仔狠心地說。
「予伊出去死上好，看著彼個馬臉、蒜頭鼻、暴牙又擱喙臭的臭查甫，我就強強欲吐，這種翁婿我甘願毋挃。伊若是出出去死，我來去大山做尼姑嘛甘願！」春嬌咬牙切齒地說。
「我生目毋捌看著恁這對母仔囝心肝彼呢雄！當初恁若是看伊袂佮目，就毋通招伊入來。今仔日既然春嬌已經佮伊大腹肚啦，就愛認命，佮伊好好相處，一家大細才會和協。若是共塗猴趕走，食虧的一定是汝春嬌，帶一個囝毋免數想欲擱去嫁，嘛無人敢擱來予恁招，食老汝就知影通艱苦！」來福嬸婆不屑地說。
「笑死人！塗猴若真實共我出去死，咱的人若無人敢來予我招，憑我春嬌的面型佮身材，我招一個北貢官長來予汝看覓，到時鄉里人攏著叫我太太！」春嬌得意地說。
「毋通佇家己的臉抹粉點胭脂！講一句較歹聽的，到時啥物人來予汝招，啥物人衰三代！若是親像恁毋仔囝這種樣相，對待塗猴彼種態度，一定會予老北貢拍半死。毋通認為每一個老翁攏會痛芘某，老北貢的性地若是舉起來，恁祖龕內的祖公祖嬤，一定會予一雙一雙共伊請出去，到時恁母仔囝欲哭就無目屎。」來福嬸婆警告她說。
「彼個是阮的代誌，毋免汝家婆！我勸汝啦，食老著認老，食飽閒閒定定踮恁第育孫，毋通出來管東管西，若是管傷過頭，有一日一定會予汝歹看！我擱請問汝，塗猴是佮汝啥物關係，汝物代閒毋閒欲替伊講話，敢講伊予汝啥物好處？」春嬌反問她說。（二一）