尤其汝討厭伊，毋佮伊睏，一人睏一間，無成是一對翁某，認真講起來，按呢對人實在是傷過份，但是伊攏忍起來，無佮咱計較。透早抑末食糜，粗桶擔就擔起來，擔豬尿去山沃肥；犁舉囥肩頭、手牽牛，去山戇戇佇種作。若毋是伊，靠恁老爸一個人會做半死！我拄拄仔想，咱母仔囝對伊按呢實在無起工，莫怪來福嬸婆會看袂落去，不時佇替伊講話。鄉里嘛真濟人對咱的作法不認同，會使講予人嫌甲強欲臭頭，拍歹名聲無打緊，踮這個鄉里強強欲徛袂咧落才夭壽喔。」狗屎嬸仔無奈地說。
「當初汝哪會共我招這隻塗猴？敢毋知伊是彼款予人看著、就欲吐欲吐的人。」春嬌不屑地說。
「彼陣拄拄驚汝招無翁婿、變成一個老姑婆，才會趕趕緊緊無去探聽、無去共伊相看覓。而且媒人講塗猴規矩擱搰力，毋是一個歹囝，我才放心予伊入門。想袂到伊馬臉、暴牙擱喙臭，除了予汝嫌甲臭頭，又擱毋佮伊睏，講起來實在誠歹勢。」狗屎嬸仔歉疚地說。
「阿母，咱有一句俗語話：『七揀八揀，揀一個老菜褶』，愈揀愈死啦！汝當年若是凊彩揀揀的，擱較衰，嘛毋免揀一個親像塗猴彼種範勢，來予我做翁婿。」春嬌輕視地說。
「汝著欲知影，招囝婿佮嫁查某囝是無仝款的。親像汝若是欲嫁予人，咱會使揀一個咱佮目擱妥當的查甫囝，雖然招囝婿咱也會使揀的，但是汝彼陣已經三十外歲啦，欲揀一個較晟人的查甫來予咱招，無彼簡單啦。總講一句，驚汝變成老姑婆予人笑，才會凊凊彩彩共汝揀一個，想袂到揀一個汝袂佮意的老菜褶，予我這世人誠怨嘆。」狗屎嬸仔感嘆地說。（三五）