「阿母，汝毋免怨嘆，既然囝已經生啦，我無認命也袂煞矣。尤其是查某人的青春有限，真緊就變老歲仔，若是想欲擱替咱這個家族加生幾個囡仔，我看無搬來去佮彼隻塗猴睏也袂煞矣。囝是袂偷生的啦！若是袂見笑去討契兄，嘛會予人笑一世人。」春嬌羞澀地說。
　　「聽著汝這句話，我心肝內誠歡喜。講實在的，咱母仔囝也著檢討，人，毋通拄拄看表面，規矩搰力較重要，查甫查某攏仝款。為著伊彼張予咱看袂佮目的臉，咱就講伊逐項歹，竟連食糜也嫌伊大食，一頓食五六碗，土豆配一菜盆仔，豆豉配半碗頭仔。咱袂記的伊是作穡兄，無食飽敢有氣力通種作、通擔粗擔糞，這陣想起來實在誠過份、誠過份啊！莫怪來福嬸婆伊會看袂落去，不時來共咱教訓，咱毋偌毋聽伊，而且擱佮伊應喙應舌，實在是無應該！」狗屎嬸仔愧疚地說。（三六）