「佇咱這個鄉里，毋偌來福嬸婆咧嫌咱，真濟人講咱母仔囝目睭展無金，招著塗猴彼呢規矩搰力的查甫人，著知影通惜福，毋通看塗猴是招囝婿的，就欲食人夠、夠、夠，共人食死、死！阿母，若是以我這段時間的觀察，這隻塗猴除了馬臉暴牙喙臭外，賰的實在無啥物通嫌的。我嘛幾落次想欲搬去佮伊睏，毋拄想著較早對伊彼呢無起工，共伊嫌甲流瀾擱呸瀾，咒詛這世人毋佮伊睏仝一張眠床。這陣伊無開喙，我敢好意思大面神欲去佮伊睏，見笑啦！」春嬌不好意思地說。
「講起來也是有影，當初咱按呢對伊是毋著的，若是無對人按呢，汝可能會年頭生一個、年尾又擱生一個，替咱這個家族添丁。這陣恁若睏湊陣一定抑擱會生，過幾年仔汝若停經，想欲生也生袂出來，所以汝著共身段放予軟，做一個好家內，欲生囝才有機會。」狗屎嬸仔頓了一下，又愧疚地說：「唉，講來講去，攏著怪我這個老歲仔，當初我若是勸汝毋通嫌東嫌西，好好佮伊相處，今仔日就袂有這款代誌發生。彼陣母仔囝竟然親像去予鬼拍著，仝一個鼻空出氣，共伊嫌甲無一塊好，這陣才來反悔，講起來實在誠見笑。」（三七）