「咱祖公留落來彼田園，這陣若無塗猴佇種作，靠阿爸一個哪有彼個氣力。若無種作就無收成，無收成就無五穀通食，無定著會去予枵枵死！有時看著伊大粒汗細粒汗，一領衫澹漉漉，彼呢認真咧拍拚，擱受到咱冷言冷語的對待，實在對不起咱的良心。」春嬌心情沉重地說。
「攏是我這個老查某害的啦！我毋偌無盡著做老母的責任，共汝教予好，而且擱不時加油添醋，用語言來侮辱伊。汝罵伊一句，我共汝湊罵兩句，無管著抑是毋著，一日到暗夭壽填海罵袂停，來福嬸婆叫我毋通彼歹喙，若無者，將來落地獄會予牛頭馬面掠去割喙舌。汝今仔日會佮塗猴袂合，攏是我這個老查某害的，我對不起汝啦！」狗屎嬸仔自責地說。
「阿母，汝毋通按呢講，是我毋著，目睭去予屎糊著，拄拄會曉看表面，嫌伊馬臉擱暴牙，除了用歹聽話來激伊，又擱毋佮伊睏一張眠床。若毋是彼當時予伊氣著，強強共我脫衫脫褲，強強共我壓落，雖然予我誠氣，但是彼陣若無予伊強去，今仔日囝欲從佗位來咧。阿母，這是天命啊！所以我已經想通啦，安安份份做人的家內，毋通嫌東嫌西，佮伊好好相處，共囝飼大漢，一家大細過幸福的日子，才袂予鄉里人看衰。」春嬌有感而發地說。（三八）