「汝的個性實在傷倔強，真最代誌攏是家己講家己著，無考慮別人的感受，做法也無法度通得到鄉里人的認同。鄉里人逐個攏嘛講汝歹喙擱歹死，開喙無一句好話，三口灶點無一把火。講實在的，我若是無讓汝，咱翁仔某一日到暗一定會搬鐵公雞，通予門口厝邊來看鬧熱。」狗屎叔仔無奈地說。
「狗屎也，攏是我毋著、我毋好，才會予鄉里人講我歹喙、講我歹死，嘛因為按呢講汝驚某。尤其是對塗猴彼呢刻薄，不時予來福嬸仔罵甲強欲臭頭，嘛予鄉里人嫌甲呸臭瀾，講起來實在誠見笑、誠見笑！」狗屎嬸仔自責地說。
「趁這陣抑擱活的時陣，著加做一點仔善事，積一點仔德，才會改變鄉里人對汝的看法。若是這陣無緊做，後次想欲做也袂赴啦！永遠會留一個臭名，予人佇尻川後咧批評，若予囝孫聽著，嘛會感覺見笑。」狗屎叔仔提醒他說。
「塗猴雖然毋是咱親生的，但是伊既然改名換姓來予咱招，嘛是等於是咱的囝。主要的目的，是欲予伊佮春嬌生囝育孫、共咱傳宗接代。當時春嬌嫌伊馬臉擱暴牙，我毋爾無苦勸伊，伊咧罵伊，我竟然也共伊湊罵，予塗猴一點仔尊嚴也無。我這個老歲仔實在誠該死。」狗屎嬸仔再次自責地說。
「毋爾汝該死，我這個無路用的老歲仔，金金看馬咧相踼，金金看恁母仔囝咧侮辱塗猴，竟然無替伊講一句公道話，會使講一點仔查甫人的骨氣也無，我嘛該死！」狗屎叔仔愧疚地說。（五一）