按Enter到主內容區
:::
:::

【小說連載】塗猴

發布日期:
作者: 陳長慶。
點閱率:1,013
字型大小:

  「若毋是恁母仔囝對塗猴彼呢無起工,軟土深掘共人壓死死,春嬌可能已經生第二胎啦!」狗屎叔仔不屑地說。
  「講來講去,攏是我這個老查某毋著,我應該著來去買一付三牲佮金銀紙,跪囥祖公祖嬤神主牌位的面頭前,向(亻因)請罪,共(亻因)還失禮!希望拜過了後,緊擱予咱添丁。」狗屎嬸仔說後又嚴肅地說:「狗屎也,幾十年來,予汝受到驚某的委屈,我嘛著共汝還失禮。我共汝保證,以後袂擱有這種代誌,因為恁某已經老啦,無氣力通佮汝大聲細聲相嚷、相觸。後次是我驚翁,毋是汝驚某!按呢汝有歡喜無?」
  「我足足大汝五歲,汝無氣力通佮我相嚷,我敢有氣力通佮汝相觸。食老著認老,少年十五二十時已經過去啦,棺材嘛已經囥咧廳邊佇等咱。若欲留一個好名聲,趁活咧世間的時陣,加做一點仔善事,加關心一點仔鄉里代誌,加疼惜家己的囝孫,按呢才會得到天公祖的保庇。」狗屎叔仔語重心長地說。
  「我會共汝的話記囥心肝內,袂擱予汝揹一個驚某的包袱,也會共塗猴當著家己的囝來疼惜;鄉里代誌我會來去請教來福嬸仔,向伊學習。若是拄著鄉里人嫁囝娶新婦,抑是有老歲仔去做佛,我一定會從頭湊到尾,袂親像較早毋出面,坐佇咱第看鬧熱。狗屎也,我講會到、做會到,汝毋免煩惱,袂予汝落氣啦!」狗屎嬸仔信心滿滿地說。
  「鄉里代誌親像咧做功德,一人若出一點仔力,代誌就好辦。塗猴雖然是別的鄉里來予咱招,但是若拄著鄉里有代誌,伊攏是走第一,主事者知影伊較有氣力,攏嘛分配較粗重的工作予伊做,伊毋爾袂計較,嘛袂算識。誠濟人佇我面前咧呵咾伊,予我誠有面子。」狗屎叔仔據實說。(五三)

  • 金城分銷處
    金門縣金城鎮民族路90號 金城分銷處地圖
    (082)328728
  • 金湖分銷處
    金門縣金湖鎮山外里山外2-7號 金湖分銷處地圖
    (082)331525
  • 金沙分銷處
    金門縣金沙鎮官嶼里官澳36號 金沙分銷處地圖
    0933-699-781
  • 金寧分銷處
    金門縣金湖鎮武德新莊118號 金寧分銷處地圖
    0910334484
  • 烈嶼分銷處
    金門縣烈嶼鄉后頭34之1號 烈嶼分銷處地圖
    (082)363290、傳真:375649、手機:0963728817
  • 金山分銷處
    金門縣金城鎮民族路92號 金山分銷處地圖
    (082)328725
  • 夏興分銷處
    金門縣金湖鎮夏興84號 夏興分銷處地圖
    (082)331818
回頁首