窗邊人相招，起床等食燒，擔絲綾搖搖，路攑電火照。
到位先坐定，嗍薰等點名，一聲接一聲，人綴人起行。
衛兵收證件，擔綾到沙坪，夯櫓搶頭先，扛船拚頭前。
疊綾船出動，撐槳過涌浪，扞舵順閣穩，魚場相互準。
絲綾好數放，紐綾相接縛，規艚放無停，看點鐘收成。
有的誠百斤，有的十外斤，互相來評論，個人就認份。
暴頭偌是來，大風夠厲害，船隻搟閣擺，性命無重值；
洶涌無時停，斷索失絲綾，危險掠魚命，喝聲船起行。
偌是霧湖天，𠢕欸看干經，暗礁知張持，求平安順遂。
欲蹆有風勢，褫帆升屹憩，轉帆即起工，搖櫓綴輕鬆。
某看著帆點，擛手一直唸，別船已經到，翁壻佇尾後。
見船頭則知，煩腦放落來，翁壻去食糜，絲綾我來揣。
新手抵拄拄，剝魚規晡久，熟手揤閣捸，成一垺來抔。
黃隻油參刺，青鱗芳出味，凸目湯頭甜，珠帶金爍爍。
馬加無大尾，鰻魚踅籃底，綾著青跤蟹，纏破補費氣。
絲綾閣再織，出尺量出聲，新綾有新命，著魚拌閣揚。
賣魚欸出聲，現流煎好食，新魚明日掠，保領誠加額。