按Enter到主內容區
:::
:::

塗豆謠

發布日期:
作者: 許生土。
點閱率:837
字型大小:

昔果山塗園,紅色相賽遠。作穡兄激算,名聲出金門。
節氣無阿差,骨力作穡骹。清明前骹兜,出動種塗豆。
種作掖火烌,蟲袂來拄園。牛拖犁成溝,人向腰綴後。
兩粒接兩粒,骹踏堀捷捷。偌是拖犁緊,後壁緝袂停。
離矣一大站,放種叫加人。親像鬥相共,半晡則完工。
生出虎兒牙,捅踹塗必裂。雨水順來憩,安爾就好勢。
欉仔長青青,雜草偎來生。動草鋤相見,工課看勢抦。
草根拄塗鬆,日曝死空空。塗香相接生,搤深揪費氣。
因量是塗香,一香湠九香。現丟落深空,袂予風吹來。
百日作等候,相招薅塗豆。園域拄好溡,仾省力薅起。
塗面偌繃絚,鋤頭掘大力。近日落大雨,薅屹規模塗。
園無鳥鼠空,亦無烏肚蟲,逐堀攏有欉,食神報好康。
藤仔撩枝瘦,塗豆好弄鬆,捎屹好勢挽,誠緊貯一桶。
釘點木蝨棄,喙笑亦目笑,邊仔人看著,挽矣幾偌石。
園頭邊仔股,塗豆遮尚好。結仁仔來煠,曝焦好食矣!
熟的緊賣完,實情啥因端?有紅土即款,塗仁則會芳。
三粒公的少,兩粒的尚濟,孤粒的加減,囡仔揣過癮!
擘種佇冬天,偎來囡仔嬰,阿母熟參生,為著生趣味。
熟的有通食,生的相賽揤,寒矣手抐钩,搣殼落火熥。
下昏十點時,塗仁規桶滇,塗骹亦清氣,好睏的一眠。
土豆有真情,年年歡喜種。唸唸土豆經,拄著真好用。

  • 金城分銷處
    金門縣金城鎮民族路90號 金城分銷處地圖
    (082)328728
  • 金湖分銷處
    金門縣金湖鎮山外里山外2-7號 金湖分銷處地圖
    (082)331525
  • 金沙分銷處
    金門縣金沙鎮官嶼里官澳36號 金沙分銷處地圖
    0933-699-781
  • 金寧分銷處
    金門縣金湖鎮武德新莊118號 金寧分銷處地圖
    0910334484
  • 烈嶼分銷處
    金門縣烈嶼鄉后頭34之1號 烈嶼分銷處地圖
    (082)363290、傳真:375649、手機:0963728817
  • 金山分銷處
    金門縣金城鎮民族路92號 金山分銷處地圖
    (082)328725
  • 夏興分銷處
    金門縣金湖鎮夏興84號 夏興分銷處地圖
    (082)331818
回頁首