無同年代的金門人，講本地話有無同的背景，我出生佇四十年代初，經過七十捅年，土話講屹總是有經驗，借著機緣，土話學習來作分享，提出家己的看法。
囡仔學金門話，生活中會拄著：「食食、活動、生物、禮俗、景緻等等。」誠好作題，創出教材，日常人邀人，本地話當咧踹，練互相接穿。囡仔攏是精霸霸，作一會只要話頭開，好奇心加愛展，自在去發表，就會湠開物項的話句。當用「韻」來牽承揚拌趣味，若像「槌仔槌！會曉摏袂曉擂；筅仔筅！會曉掃袂曉反」；「一支手機，踅線來開始，攄去作遊戲，選著資料就欲挃」；「蜂飛西，蜂飛東，花媠花芳，見芯軁入空，喢著準好康！」有通相教相學，順韻牽連，學話應是緊緊會見效。
初況生疏學話，腔口帶澀，只要敢講常談，久自然輪轉。先試探學生底諦的深淺，設計好主題，咱的民俗款有過年、五月節、過中秋……；食食物有貢糖、桶餅、蚵嗲……；活動項有拍桌球、棒球、洇水……；生物類有番薯、鱟、烏燕仔等等，有見過就有印象，喙食過、耳聽過、手動過，味鼻過、目見過，相干過的貯屹「滇滇一大籠」，好數挑選，寫成謠，得人疼，當好唸引導討論，提出問題，教者在心，過程接意，話掜景，誠拄好、對話即自然，「鴨仔聽雷」無從來發生！
特殊欸！「歟ir」「呃er」兩音，根底是金門腔，有的人就是「教袂就逝」，返轉比較四五十年代出世者，本地人並無這困擾，聲調正板正板！應是當年的環境，喙若聲音出，好作比評，連通順紲有咧調整。人群中相應話，順口矣順口！揣例來講說，「歟喲！無穿褲，袂見肖，揫揫臉！」「歟喲！活靈靈，無天良的媠。」有意外的感覺「歟喲！」洶洶出聲加氣力。換作「呃」來講，當年作穡飼豬抾錢作垺，飼豬講豬仔話，「呃仔，咂！咂！咂！」「呃仔！夯頭夯耳，真否飼！」「伊真呃贅！呸彼桌，滿佇塊。」「歟」亦「呃」綴情境就好勢講，方法著原腔自然在，就袂走音離了位。
孽是囡仔的天性，愛比竅爭表現，號伊是激骨、孽哥、孽潲、孽譎攏會通。生活言語相抵拄，連鞭時共謳咾、說笑、譬相等等。一搗過一搗，練矣有夠額，必然就輪轉。掠五十年代彼流擺，提供幾句矣作參考：「臭頭！臭頭！無人拍家己流」；「尖喙鷹講矣無一句正經」；「鼻蚵！鼻蚵！若食若佚陶」，……原在是帶韻的話句，論範勢不止矣濟！孽哥若開喙講，有的鬥拍邊鼓，興興加趣味，分伻心適代，講了順順，呾來呾去，暢忽忽就「起冒鈃！」金門話講屹，展出快樂的氣氛。當今情境改變，應小可轉踅一下，「舊矸貯新酒」，新背景韻鬥句，囡仔才有感覺。親像「毋知死，看手機，無休息，等近視」；「走相緝，強欸先走，差欸出去緝，邊矣喝聲緊緊緊」；「公花唚母花，唚來唚去生金瓜」，能者會曉轉踅，當咧學話聽會踹。有人帶頭唸，接句牽韻白，練習有胚模！聽落去，你一句，伊一句，開心花，捷捷練，因量湠開有夠額，「金門腔」模仿就自如自如！
自從推行國語，減少講土話的機會，本地話沓沓失落，變成揀人會。年紀大欸！保存有老言詞老聲調，趁準人在，邀伊交談，年輕者好承接！重值大家議研，老聲音錄影參音，袂閣等欸！摘老話句成語料，著立捷！早時阮聽過「導攏、黜瑯、傻央、搣沐、挐據、死牾揭……」，四常即講踹，對方霧嗄嗄！行往泡茶間、復健室、安老院等等的所在，拄霎仔亦聽會著，記錄為先。每一句俚語攏有背景，重用老人說明相掜故事，毋通無稍無略，等消失，怨可惜！
新學界的一代，有所專長，擬音攏有「三二步七矣！」接近老人好對談，精精金門腔，真模仿，去流傳，才袂講矣「不答不七！」社區下昏舉辦土話活動，創設手機有土話的群組，「優酷」鋪有土話的影片，學堂教學助推展，有機會，就來講，聲韻相接比，生湠當是時，唸謠有才調，歡喜學了了。話是用講欸！咱有底諦，老欸好心情，下勻的興興，好得共拍拚，金門文化命，腔口精，才應該！
面頂寫屹憩，順勢出範例，閒閒作藝量，金門腔成樣，出觀點，請指點！
01〈啉三喙〉採錄
透早屹，綴俺媽，去菜巿。看著菜，阮就買，捾矣重鎚鎚。蹆到第，喘大氣。連啉啉茶啉三嘴。
02〈蚵嗲〉
菜甜甜，蚵鮮鮮。造一杓滇滇，放落油鼎糋。皮脆真好貨，好味收內貯。點心頓，來相綴。心適食，有夠額。食過咧呵咾，隨身去相報！
03〈燥仔股〉
麵粞伸長長，搓就滾掄捘。相拍合一股，閒時來後浦。燥仔股，翁憶著某，某知相照顧。兩人就來哺，感情更加好！
04〈滿煎嗲〉
滿煎嗲！圓圓一大塊。柴火燃順順，頂面浡倉倉。灑落土仁麩，藃覆抦半塊。糗戴戴，食著好貨，央有下一過！
05〈馬花糋〉
馬花糋，雙爿生，分開中央甜。白蔴籽，仾看見！唌來囡仔嬰，照分免相爭。無夠額，一百箍，買來添。
06〈豆芽〉
豆芽！豆芽！相賽踾。看無日，伸出白。根參根，相交扯。搣起來，落落灑。炒一盤，配飯真好勢！
07〈鹹粿〉
石坊跤，來去踅。大籠床，炊鹹粿。截細塊，糋一回。點心頓，真好貨。大細漢，咧講說。
08〈大坩婆〉
大坩婆！大坩婆！煮麵線，欲參蚵。一碗食，一碗看。聽著骹步聲，崁崁作規碗。家己講，門先閂，門先閂。
09〈枷車餅〉
腹肚枵，囡仔咧反營。「背鼎仔阿公」，先出聲，去買「曲跔餅」。店頭毋知影！有賣「枷車餅」，彎形真好食，就是即款餅，同物無同名。
10〈火金星〉採錄
火金星，來食茶。一杯酒，四尾蝦。蝦有鬚，魚有骨。食泔糜，迄囫囫。
11〈燕菜〉
倩舘棧，鰲反抦。肉合菜，截幼絲。頂魚翅，好料理。紲來添，金門味。
12〈釘秤兒〉
釘秤兒，先消風。作點心，來啖糝。煱鼎邊，甜閣芳。阮俺母，來抦弄。骨力欸！作穡人。食食物，惜甘甘。
13〈大頭狗〉
吠無停，大頭狗，見骨頭，趨趨走。觸著石頭，翻身拋輾斗，抦作揜尾狗。
14〈炒米粉〉
一的炒米粉，二的昌昌滾，三的身伸輪，四的來鬥分，五的數人份，六的食有賰，七的欲請孫，八的當愛睏，九的倒落潘，十的交懍恂！
15〈挐潘桶〉
傷暗看無，挐潘咋槽，烏騾沐渣，垃圾染騾！天光睏屹，重洗重摒，牽騾離牢，就山起行。
16〈人的部位〉採錄
大山一抱菅，落來兩逝岸。岸下一對燈，燈下一個墓。墓下一個堀，堀下一個堵，堵下兩條雙叉路。
17〈結婚〉
新娘新葱葱，新郎真大範，花童抱花欉，喙笑目笑作媒人。
18〈叫人客〉採錄
無三不成禮，無四不見體，阮姊亦未嫁，紅包提來憩。
19〈龜合牛〉
過山龜坐牛，渡海牛騎龜，拚矣過頭久，睏睏作一垺。
20〈猴合狗〉
狗仔跳過溝，咬著牛骨頭，老猴咧戲弄，空中拋輾斗。狗仔舉頭看，交落落骨頭。老猴咬咧走，狗緝大聲哮。