虎嬸仔怨嘆地說：「總講一句，大箍呆這個夭壽囡仔毋捌寶，金金看秀香嫁予人做某，家己才來癮仙膏。春嬌仔，予汝講，我會怨嘆袂？」
春嬌嫂安慰她說：「秀香是一個捌世事的查某囡仔，伊會有孝汝，也會經常來看汝。大箍呆某緣若是到，某自然就來，汝毋免煩惱傷最啦。」
虎嬸仔看看外面的日頭，囑咐她說：「時間無早啦，汝去看秀香妝好未，叫伊粉較緊抹抹矣，胭脂點予喙唇紅紅就好，毋通慢吞吞，稍等的花轎就欲來扛伊去啦。」
「虎嬸仔，講實話啦，秀香原本就生了誠幼秀、誠水，毋免妝嘛是水。」
虎嬸仔不屑地說：「秀香這個夭壽新婦仔，無我的緣，又閣顧我怨，所以我無感覺伊幼秀、伊水。講實在矣，緊嫁嫁去死緊好，若無母仔囝兩個，一日到暗相對相，是佇加刺目矣。可憐無人知喔，飼新婦仔無啥物路用啦，飼大嘛是別人的，是佇加氣痛、加了五穀矣。春嬌仔，我這世人哪會彼歹命咧！」
春嬌嫂趕緊安慰她說：「虎嬸仔，汝毋免煩惱，汝會好命啦，秀香雖然嫁出去啦，但是大箍呆伊會孝順汝，一定袂予汝甘苦，汝放心！我緊來去看秀香妝好未。」說著起身就走。（一○一）