阿公佮阿嬤
親像一對神仙尪某
逐日讀經祈禱
擱唱詩歌
經文詩歌攏寫佇黑板
我站佇門外口
遠遠的看
看(亻因)有起來食飯無？

逐工讀經祈禱
擱唱歌吟詩的老尪某
攏(勿會)厭善
原來是讀不同的聖經
唱不同款的聖詩
毋過阿嬤心臟無好
煞去尋上帝

彼日開始
阿公共日曆拗起來
用塑膠袋封起來
無擱剺日曆
我看一下 心想
阿公有遮爾傷心？
連日曆都毋免擱剺
我煩惱阿公是毋是會真失志

結果過毋三日 伊一個人
猶原逐日讀經祈禱
擱唱歌吟詩
經文詩歌猶原攏寫佇黑板
我站佇門口
猶原 遠遠的看
看伊 有起來食飯無？